Tuir Vise Primeira Ministru no Ministra Solidariedade Sosial no Inkluzaun, Armanda Berta dos Santos, hatete, objetivu husi asina akordu ne’e mak oinsa atu MSSI atu bele fó apoiu orsamentu ba ISS, atu sira bele hala’o programa no halo atendementu ba ema vulneravel sira.

“Ohin halo akordu kooperasaun ho Instituisaun Solidariedade Sosial 29 no kada tinan prevee orsamentu millaun U$1 hodi apoiu ba instituisaun refere,”dehan nia iha salaun MSSI, kinta ne’e (12/05).

Ministra ne’e, hatutan, kada tinan governu sempre apoiu instituisaun sira atu fasilita ema vulneravel sira mós vitima sira ne’ebé hela iha Uma Mahon.

Ho nune’e, Governante ne’e, husu ba Instituisaun Solidariedade Sosial sira iha munisipiu 12 inklui Rejiaun Administrativu Espesial Oekuse Ambeno (RAEOA), atu iha responsabilidade maximu ba servisu sosial nian iha munisipiu no halo atendementu ne’ebé diak ba sidadaun sira ne’ebé presiza liu.

Iha fatin hanesan, Diretóra Fokupers, Maria Fatima, hatete, fundu ne’ebé sira simu, atu fasilita no halo atendementu ba vitima violensia bazeia ba jeneru.

“Purtantu ami nia servisu ho parseiria sira ne'e, atu responde ba iha kazu violensia bazeia ba jeneru ne'ebé akontese,”Diretóra ne’e haktuir.

Entretantu, Diretór Asosiasaun Halibur Defisiensia Matan Timor-Leste (AHMTL), Gaspar Afonsu, hatete, kada tinan Parlamentu Nasional aprova orsamentu ho montante ne’ebé boot, maibé governu apoiu ba iha instituisaun sira kiik tebes.

Ho ida ne’e, prejudika tebes ba iha programa defisiensia sira nian.

"Orsamentu tinan ne'e, kompara ho tinan kotuk lahanesan, tanba tinan kotuk ema ho defisiensia hetan dolar amerikanu rihun $63.296, maibé tinan ida ne’e, sira kua tan 30% hela deit rihun 44.504,”nia dehan.

Ho nune’e, nia senti triste tanba governu ladun tau prioridade bae ma ho defisiensia.