“Iha Tasi-Tolu hanesan ita bo’ot sira haree, ita halo ona fatin para ba iha serimonia investidura nian no parte tekniku sira informa katak, ne’e atinji ona 80%, iha loron rua ka tolu tuir mai, ha'u hanoin fatin ne'ebá sei konklui 100%,”dehan nia ba jornalista sira, iha Parlamentu Nasional, kuarta ne’e (11/05).
Governante ne’e hatutan, serimonia ne’e, sei hahú ho misa agradesementu iha Katedral Dili, iha loron 18 maio.
Nune’e, iha loron 19 maio, tuku 5:00 lokraik, komisaun organizadora sei inisia prosesu ba serimonia investidura ne’e, maibé antes serimonia ne’e la’o, sei hahú uluk ho atividade no animasaun balun husi artista timor-oan sira.
Aleinde ne’e mós, iha tuku 8:00 kalan sei iha divertimentu kolosal ida, ne’ebé grupo balun sei ba halo aprezentasaun kolosal durante oras ida nia laran, ho tema “Konstrusaun do Estadu”.
Iha oportunidade ne’e, Governante ne’e, husu ba populasaun sira liu-liu iha munisipiu Dili, atu bele iha tuku 5:00 lokraik, hakbesik ona ba iha Kampo Tasi-Tolu hodi asisti seminomia sira, molok serimonia investidura ne’e hahú.
“Purtantu ita prevene serimonia ne'e, sei hahú iha tuku 9:00 kalan ba tomada posse ba Prezidente Republika Eleitu José Ramos Horta,”tenik nia.
Nia haktuir, serimonia invertidura tinan ne’e prevee orsamentu dolar amerikanu tokon U$1.6 kompara ho tomada posse iha tinan 2012 no 2017 ne’ebé gasta orsamentu ho mantante dolar amerikanu U$6.
Entretantu, Ministru ne’e akresenta, ba serimonia ne’e Komisaun Organizadora simu ona informasaun husi Xefe Estadu, Xefe Governu no Prezidente Parlamentu husi nasaun estranjeiru, ne’ebé atu mai partisipa serimonia ne’e mak hanesan, Prezidente Republika Portugal, Primeiru Ministru Guine Bisau, Governador sira husi Australia no mós Ministru sira husi Nova Zelandia.
"Ita nia Presidente Republika Eleitu José Ramos Horta mós konvida ninia ema lubun ida, ne’ebé komisaun organizadora toma nota no ema sira ne’e konfirma ona atu partisipa,", katak nia
Enkuantu, Governu liu husi komisaun organizadora sei prepara fatin ou alojamentu no hotel sira atu konvidadus sira ne’ebé mai husi estranjeirus.
