Tuir Magnifiku Reitor UNTL João Soares Martins hatete, kursu Diploma III, la persija halo ba rai li’ur, UNTL prontu atu bele oferese formasaun sira ba entidade, uza forsa maximu hodi bele halo formasaun ne’e.

“Objetivu ida ohin asina MoU ho MS ne’e atu intrega bolseiru pos laboral enfarmajen no parteira DIII na’in 180, atu bele hahú ona ensinu aprendijazen foun hodi bele eleva liu tan koñesimentu iha area ida-idak nian,” dehan nia iha Palasiu da Cinzas, Kaikoli, hafoin asina MoU, (01/02).

Nia hatutan, ba formasaun Diploma III ne’e bele halo iha rai laran, maibé bainhira haruka ona pessoal saúde ba kursu iha rai li’ur ne’e,  ba formasaun  ne’ebé seidauk iha rai laran, mak hanesan espesialidade hemorazia no kardiolozia.

Nia dehan, Hospital Nasional Guido Valadares (HNGV) rasik iha kondisaun hodi halo formasaun sufisiente, nune’e  desde 2007 hahu ona formasaun, maibé ema la rekoñese.

Maibé HNGV hala’o  nia knar hodi  kontinua fó formasaun ba pessoal saúde to’o ohin loron,  hamutuk ho entidade hotu atu bele servisu di’ak liu tan kona-ba formasaun no rekursu barak liu  iha area saúde nian.

“Kona-ba fasilidade ita bele dehan katak, ba areas jerais ita sufisiente atu bele halo formasaun, ba sira ne’ebé  mai ho espesialista konserteja ita sei la halo iha timor,” informa nia.

Iha fatin hanesan, Ministra Saúde, Odete Maria Freitas, hateten, Ministeriu Saude kontinu ajuda hodi ko’alia di’ak liu tan ba pessoal ida-idak nia abilidade atu servisu la’os iha matenek de’it.

“Ministeriu Saude  hakarak kontinua nafatin prosesu hirak ne’ebé  halo ona, liu husi formasaun ida ne’e atu bele eleva ita nia pessoal saúde sira ne’ebé durante ne’e servisu, liu-liu atu fó formasaun ba sira, fó kapasitasaun ba sira durante tinan rua nia laran.”

Nia dehan, hafoin  funsionariu Saúde  determina estudu, Ministeriu Saude sei la dehan atu aloka ba ne’ebé, tanba hanesan pesoal saúde ka funsionariu saúde iha lei ne’ebé  klaru,  oinsá prontu atu koloka iha fatin ne’ebé de’it Ministeriu Saude persiza hodi halo atendimentu ba pasiente sira.

Ministeriu Saude husu ba funsionariu saude sira atu iha adaptasaun ba formasaun ne’e no labele falta, kuidadu saude atu labele moras hodi akompaña nafatin material sira ne’e durante tinan rua nia laran, hafoin hotu mak Ministeriu Saude aloka sira ba iha fatin ne’ebé, depende ba iha sira nia background ida-idak,” nia hateten.