“Kooperasaun entre AJTL ho UNFPA ne’e atu dezamina informasaun kona ba isu juventude, isu mortalidade ba inan isin rua no mós isu foun sira seluk, nune’e ami presiza media sira fó informasaun ne’ebé ho lolos ba komunidade sira,”dehan Reprezentante UNFPA iha TL, Pressia Arifin-Cabo iha Salaun Kofi Anan, Kaikoli, (13/10/23).

Nia hatutan, media nia papel mak atu fó sai informasaun ne’ebé kredivel no faktus.

Iha fatin hanesan Presidente AJTL Zevonia Vieira, agradese ba kooperasaun ho UNFPA ne’ebé foka liu ba saúde feto nian, violensia bazeia ba jéneru no violensia hasoru feto no labarik.

Nune’e, media nia kobertura hanesan mós halo advokasia atu muda   ema nia hahalok no bele fó influensia ba ukun na’in nia desizaun no protesaun diak liu ba grupo vulneravel sira.

“Liu husi kooperasaun ne’e mós atu hasa’e koñesimentu ba jornalista sira atu halo advokasia ba problema saúde liu-liu ba feto sira no bele kombate informasaun falsu sira ne’ebe la fó benefisiu ba ita nia komunidade sira,”hakotu nia.