Administradór Munisipiu Aileu Abel da Conçeição

Tuir Administradór Munisipiu Aileu Abel da Conçeição, hatete media lima ne’ebe distribui jornal ba iha munsipiu no postu sira ne’ebe iha vila, liliu munisipiu Aileu kada loron la’o hela.
Tanba tuir nia, hahú husi loron 04 fulan-Setembru kada loron ekipa sira distribui jornal ba sira nia gabinete.
“Entaun jornal ne’e kuandu tama mai iha gabinete adminstradór munispiu, ita sei kontinua distribui ba, kuandu ita nia xefe suku sira mai tuir enkontru balun ita entrega bá depois jornal ne’e balun ita distribui ba diresaun sira, iha servisu munisipál nia,” dehan nia Jornalista Televizaun INDEPENDENTE, iha Knar fatin, Aileu, (12/010/23).
Tan ne’e, Administradór mós fó hanoin ba ekipa responsavél ba distribuisaun jornal iha munisipiu Aileu, atu kontinua distribui jornal ba komunidade sira nune’e, atualiza nafatin situasaun real iha rai laran.
Iha biban ne'e Administradór hato'o agradese ba SEKomS tanba bele kontratu ona ho media sira, maske produs iha nasionál maibé bele asesu to’o iha área rurál.
Tan ne'e Administrador husu ba média sira ne'ebé hetan oportunidade ne'e tenki iha responsabilidade hodi nafatin distribui ba munisipiu no Postu sira.

Iha fatin seluk, Prezidente Autoridade Munisipiu Ainaro, Leobazildo Xavier Preira hatete, foin dadauk jornal ne’e mai limitadu hela, maibé distribuisaun jornal durante ne’e la’o diak tanba, sira akompaña jornal iha informasaun konaba kritika no iha buat barak ne'ebé ko'alia konaba rai laran no mós nasaun iha ASEAN.
Aliende benefisiu husi jornal ne’e, komunidade balun mos seidauk iha televizaun no telemovel entaun sira bele asesu informasaun liu husi jornal sira.
Nia dehan, munisipiu Ainaro iha postu haat, presiza espalla tan jornal sira ne’e to’o ba iha postu, bele to’o tan suku, no komunidade sira mós bele asesu ba notisias sira ne’e.

Segundu komandante PNTL Ainaro, Superintendente Mario Vitor da Costa

Segundu komandante PNTL Ainaro, Superintendente Mario Vitor da Costa, apresia tebes ba koperasaun entre SEKomS ho media emprime ne’ebé distrubui jornal to’o iha munisipiu.

Tanba liu husi informasaun ne’ebé iha jornal, sira bele akompaña informasaun ne'ebé jornalista sira rekolla kada loron iha rai-laran.
“Hanesan pesoal ha’u senti kontenti, tanba ne’e hanesan meiu ida atu motiva ita nia ema hodi kontinua lee no bele haklean liu koñesimentu konaba saida mak akontese iha ita nia rain rasik. no apresia ba ita boot sira nia organizasaun tanba bele lori informasaun mai to'o iha munisipiu Ainaru,” dehan nia.
Nia afirma, liliu ba iha Polisia Nasional Timor-Lorosae (PNTL), Komandu Munispiu Ainaro no mós ba membru sira bele hetan mós oportunidade hodi asesu ba informasaun nasaun nian.
“Jornal sira ne'e durante fulan ida ona, mai to’o iha ami nia gabinete kada loron, tan ne’e hakarak kontinua hela deit atu nune'e fasilita diak liu ami hodi asesu informasoes,” katak nia.
Segundu Komandante PNTL Munisipiu Ainaro ne’e mós, rekomenda ba media lima ne'ebé halo koperasaun ho SEKomS ho inisiativa ida kontinua nafatin distribuisaun jornal ne’e, atu nunee sira bele asesu ba informasaun rai laran nian ho lais no atual liu hodi bele apar ho situasaun sira.

Manuel de Deus tekniku Adnimistrasaun Aremajen Reijonal Ainaro
Entretantu, Manuel de Deus tekniku Adnimistrasaun Aremajen Reijonal Ainaro afirma katak, kada loron sira simu jornal lima hanesan, INDEPENDETE, Timor-Post, Dili Post, STL News no Diariu Nasional.
Tuir akordu entre SEKomS ho diario nasional lima liuhusi programa “Fortalesimentu Meiu-Komunikasaun Sosial”, hodi distribui jornal ba Munisipiu 12, la inklui Dili.
Liuhusi akordu ne’e, SEKomS sosa jornal ba kada media 184 exemplar kada loron, ba jornal lima total hamutuk 920 kada loron, ho folin 0.50 sentavus kada exemplar.
Akordu ne’e ho durasaun fulan hat, hahu husi fulan Setembru to’o Dezembru 2023.