Sekretáriu Estadu Ensinu Sekundariu Jerál no Téknika Vokasionál Domingos Lemos Lopes husu ba Diretór edukasaun no Diretór eskola sira husi munispiu no tenki tau responsabilidade másimu bainhira akontese situasaun ruma.
“Bainhira pontus ezame sira to’o iha munisipiu, klaru katak diretor sira tenki assume kedas responsabilidade, bainhira ba to'o iha Postu polisia sira ne’e kabe ba diretor sira nia responsabilidade no husu atu bele asegura”, dehan nia iha Salaun VIP, ME, Vila-Verde.
Sekretáriu Estadu afirma, bainhira hala’o ezame nasionál sei iha monotorizasaun husi ekipa sira, tan ne’e ME husu atu diretores no funsionáriu sira atu tenki seriedade.
“Orsida ezame nasionál mós ekipa sira sei ba to’o munispiu, sira atu observa no monotoriza direitamente ba prosesu ne’ebé la’o loron hira nia laran,”tenik SEESJTV.
Tan ne’e, ME husu ba Diretór munisipal sira katak karik iha situasaun ruma mak ladun diak iha eskola sira, ME la presiza ba too fatin, maibé diretór sira bele atua deit atu nune’e labele sai boot.
Enkuantu, Pontus ba ezame nasional ba ensinu báziku iha materia matemátika, siénsia naturais, istória, portugués, inglés no tetun. Ba Ensinu sekundáriu Jeral (ESJ) iha matéria hitu, hanesan Portugués, inglés, matematika, fizika, biolojia, kimika no tetun,
Eskola Teknika Vokasional iha materia ualo hanesan, siensia sosial ba humanidade, Portugués, Inglés, ekonómia, ístoria, Geografia, sosiolojia no tetun.
Entretantu, ezame nasional ne'e sei realiza iha loron tolu hahú 16-18 no ezame lokal sei 19-21 fulan-Outubro 2023.
Estudante finalista ne'ebé atu tuir ezame nasionál iha tinan ida ne'e hamutuk 56, 495 ne'ebé kompostu husi Ensinu Báziku 29,100, Ensinu Sekundariu Jeral (ESJ) 23,256 no Eskola Téknika Vokasionál (ETV) 4,142.
