Tuir Embaixadór Japaun iha Timor-Leste Kimura Tetsuya hatete, Objetivu husi asina ne'e, atu apoiu rezilénsia ba komunidade sira, tanba Japaun servisu hamutuk ho Governu Timor-Leste iha área oioin hanesan infrastrutura, saúde no edukasaun.
"Ba projetu ida ne'e, ita espera katak sei benifisia ba uma-kain rihun 16 no nia ema hamutuk rihun 75, ne'ebé ho metade husi ne'e feto,” dehan nia iha Salaun Koffi Anan, Kaikoli, tersa (28/02).
Embaixadór ne’e hatutan, Governu Japaun halo advokasia ba ideia seguransa umana nian ho ida ne'e mak nia hakarak proteje komunidade sira iha nivel rural no atu empodera komunidade sira hodi rezidente liu tan.
Nia haktuir, Timor-Leste foin dadauk afeita makaas ba Covid-19 no mós inundasaun ne’ebé akontese iha tinan 2021, tan ne’e Governu Japaun hakarak prepara komunidade sira iha TL atu bele hadi’a di'ak liu tan sira nia preparasaun hasoru dezastre oioin ne'ebé sei mai iha future.
Iha fatin hanesan, Reprezentante UNDP iha Timor-Leste Munkhtuya Altangerel hatete, projetu infraestrutura komunitaria ba rezilénsia ne'e konjuto husi UNDP, Governu Japaun no mós Timor-Leste no atividade ida ne'e la’ós ba dahuluk maibé antes ne’e atividade refere la’o ona.
Nia dehan, projetu infraestrutura komunitaria ba rezilénsia sei foka liu ba konstrusaun hamutuk unidade 40, ne’ebé kompostu husi kontrusaun uma, bee moos, saneamentu, sintina públiku, moru, ponte, sentu komunidade no sentru ba maternidade.
Entretantu, Ministru Administrasaun Estatal (MAE), Miguel Pereira de Carvalho senti kontenti tanba parseiru dezenvolvimentu fó fiar ba Governu liu husi sistema ne'ebé iha, liuliu sistema implementasaun dezemvolvimentu infrastrutura rurais sira ne'ebé Governu uza hanesan, Programa Nasional Dezenvolvimentu Suku (PNDS) ho Programa Dezenvolvimentu Integradu Munisipiu (PDIM).
