Tuir observasaun Jornal INDEPENDENTE iha aldeia Tulaika, uma ne’ebé afetadu ba konstrusaun estrada ne’e iha uma tolu kompostu husi Uma Lulik Usitako, dapur ida ho uma boot ida ne’ebé taka ho tali tahan no didin ho bebak.

Iha uma tolu ne’e, uma-ka’in rua mak hela hamutuk inan faluk ho naran Marcelina Teon ne’ebé hein uma lulik Usitako, tanba nia kaben hakotu ona peregrinasaun moris iha tempu Indonézia nian.

Iha uma ida ne’ebé kompostu ho dapur ida didin ho bebak ne’e iha ema nain 4 mak hela no Jemito dos Santos Obe mak hanesan Xefi Familia.

Durante tinan 24 ona sira halo uma lulik Usitako rai eransa ne’ebé bei ala sira hela iha aldeia Tulaika, Suku Lifau.

Vitima Afetadu Domingas Taek konta nia kronolojia kona-ba autoridade RAEOA ho Kompaña Waskita Karya PT, durante ne’e obriga sira atu sobu provizoriu Uma lulik Usitako ho uma ne’ebé sira hela ho dapur muda ba estrada ninin, hafoin estadu haree hodi fó konpensasaun ba uma no rai.

Rai ne’ebé durante tinan 24 sira halo uma hela ba ne’e nuudar eransa husi uma lulik Usitako nian hanesan rai privadu, maibé autoridade RAEOA ho Kompañia halo dezenvolvimentu estrada la halo konpensasaun atu harii uma foun ba familia afetadu.

“Ami prontu kopera ho parte governu atu halo dezenvolvimentu, maibe governu mós tenke konsidera ami hanesan povu, labele hasai ami la iha indemizasaun. Ne’e ami sei la sai husi fatin ne’e, tanba rai ami nia privadu la’ós Estadu nian,” Domingas hateten ba Jornalista Media Tour Iha hela fatin aldeia Tulaika, (23/02/2023).

Iha loron 16 Fulan Fevereiru Prezidente Autoridade RAEOA hala’o diálogu ho komunidade afetadu ba rai ho uma sira promete katak, bainhira dezenvolvimentu estrada nasionál husi ponte Noefefan liga ba Fronteira Citrana sei hetan indemizasaun husi estadu, maibé ko’alia iha diálogu ne’e laiha solusaun.

Familia afetadu sente triste ho asaun ne’ebé governu halo la valoriza sidadaun ho uma lulik hanesan riku soin ba nasaun Timor-Leste.

“Ha’u husu ba governu favor ida atu halo dezenvolvimentu tenke iha obrigasaun moral halo uma diak ida no selu ha’u nia rai, aihoris ne’ebé mak sira estraga ona hanesan batar, molok sira sobu hau nia uma. Se ida ne’e sira la halo, oho tiha ha’u mós ha’u sei la sai husi uma ida-ne’e, tanba uma foun atu hela agora laiha,” nia hateten.

Hatan bá kestaun ne’e Prezidente RAEOA, Arsénio Paixão Bano hateten, konstrusaun alargamentu estrada Noefefan ba fronteira Cistrana ne’e tenke  halo iha tinan ida ne’e, tanba ne’e uma ne’ebé hetan afetadu ba dezemvolvimentu sei selu ho uma foun.

Uma lulik Usitako ne’ebé afetadu ba alargamentu konstrusaun estrada ne’e autoridade RAEOA sei troka fali ho uma lulik foun, tanba ne’e uma lulik no ai horis sira sei la fo osan, maibé sasan ho sasan mak sei troka malu.