Vitima Afetadu Mateus Auni hateten, iha loron 21 fevereiru, Sekretáriu Estadu Terras no Propriedade fó órdem bá Prezidente Autoridade RAEOA hodi tun mai iha terrenu no informa katak, tempu besik eskavatór sei tama natar hodi dudu hotu haree ne’ebé kuda ona atu Haluan Estrada.
“Sira hasoru ha’u no ko’alia katak, eskavatór sei dudu estrada ne’e. Ha’u nia haree ne’ebé kuda ona sei troka fali ho foos governu nian tanba atu halo dezenvolvimentu estrada nasionál,” Mateus Auni hateten ba jornalista Media Tour iha Lifau, RAEOA (23/02/2023).
Informasaun ne’ebé autoridade RAEOA orienta Sekretariu Terras no Propriedade ba hasoru ona komunidade afetadu atu estrga natar ne’ebé kuda ona hare iha laran, komunidade la konkorda, tanba hare ne’e labele estraga hein kolleta tiha mak eskavatór bele tama suru estrada.
“Hau nia natar ne’ebé afetadu ba estrada nasionál ne’e hektares 20, tanba ha’u prontu koopera ba dezemvolvimentu iha rai Oe-Kussi, maibé hau nia hare labele estraga lai hein kolleta tiha, governu selu ona indemizasaun mak bele sobu natar,” nia hateten.
Vitima afetadu ba estrada nasionál provizoriamente iha uma-ka’in 339 mak sei lakon sira nia natar no hela fatin, maibé governu seidauk selu indimizaun.
Governu atu halo dezemvolvimentu estrada nasional, komunidade sira nia natar ne’e hetan afetadu, seidauk iha konkordansia konaba selu konpensasaun ruma, maibé governu rasik durante ne’e estraga ona komunidade sira nia rai balun ne’ebé abandona hela.
“Governu estraga ona komunidade nia natar iha fatin tolu hanesan Kolomboe, Tanadesa no Holokau agora abandona hela. Tanba governu promete selu indemizasaun, ami povu tinan ida ne’e la konsege halo natar,” nia hateten.
Komunidade prontu koopera ho governu, bainhira selu ona indemizasaun atu halo dezemvolvimentu iha rai Oe-Kussi, maibé ida ne’e mak la realiza governu uza forsa sobu de’it natar maka komunidade sei halo keixa autoridade RAEOA ba Tribunál.
Hatan kestaun ne’e Prezidente RAEOA Arsenio Paixão Bano hateten, natar no haree ne’ebé hetan estragus ida ne’e, autoridade halo ona diálogu ho komunidade maske seidauk iha solusaun, maibé rai no natar ho hare sei selu indemizaun.
Kona-ba natar sira ne’ebé afetadu mós ba konstrusaun estrada ne’e, depende ba komunidade sira mak hakarak bele selu ho rai no mós fó indemizasaun osan, maibé uma sei troka ho uma no ai produtivu sira sei selu konpensasaun.
