Xefe Misaun UN WOMEN iha Timor-Leste, Nishtha Satyam hateten, enkontru ohin ho Prezidente Parlamentu Nasionál, Maria Fernanda Lay, kona-ba atu fó apoiu Grupo Mulher Parlamentár Timor-Leste (GMPL).
“Saida mak UN WOMEN bele halo,liu-liu haree ba polítika no lei sira ne’ebé responsabiliza ba jender no mós oinsa, ami bele haree polítika ne’ebé bele responde ba feto no labarik feto iha Timor,” dehan nia, iha Parlamentu Nasionál, horisehik.
Nishtha hatutan, Prezidente Parlamentu Nasionál fó apoiu tebes, liu-liu nia haree oinsá WOMEN bele haree ba prioridade ne’ebé sira mós identifika, liu-liu haree ba empoderamentu feto nian no apoiu iha dezentralizasaun iha eleisaun suku no xefe aldeia sira, atu bele hetan feto iha iha pozisaun kaer knaar lideransa nian.
“Prezidente Parlamentu Nasionál mós husu ba, ami atu bele prepara dadus ne’ebé diak no análiza kona-ba, status feto nian iha Timor-Leste. Ohin hanesan enkontru primeiru, ami sei mai fali hodi halo enkontru regular ho Prezidente Parlamentu hodi ko’alia kona-ba, ami nia apoiu oinsa hasa’e kapasidade tekniku nian ba iha Parlamentu no mós ba GMPTL,” nia relata.
Iha fatin hanesan, Board Fundasaun Patria, Filomena Barros dos Reis hatete, Fundasaun Patria mai mai audiensia ho Prezidente Parlamentu Nasionlál hodi relata programa sira liga ho feto prontu lidera 100% tanba hakarak feto hamrik forte ekonómikamente feto sai líder, entaun tenke prepara kedas husi baze.
“Husi baze iha ona entaun, ita halo advokasia ne’ebé naruk fó formasaun no motivasaun atu sira forte hodi ba oin sira prontu atu simu kna’ar hodi lidera, tuir fali ko’alia kona-ba, ekonómikamente, tanba ita lakohi haree feto balun depende deit ba laen, entaun Fundasaun Patria nia programa balun ne’ebé fó ba feto maluk sira iha área remotas hodi motiva sira atu hamrik mesak nune’e Sosiedade bele moris iha paz no harmonia,” nia informa.
Nia haktuir, 30% ne’ebé uluk luta hanesan iha Organizasaun feto sira tau, agora liu ona 30% kestaun agora mak prepara tan ba dezentralizasaun tanba ne’e mak Fundasaun Patria hamutuk ho Parseiru sira balun mai ho programa ida bolu feto prontu lidera.
“Ita hein iha eleisaun suku nian, ita bele haree rezultadu oinsa mak foin bele konta dehan feto hira mak sei mai,” nia relata.
