Desde inisiu, politika governu konstitusional dasia klaru ona, katak sei la estende kontratu funsionariu kazual ne’ebé remata iha fulan Juñu ne’e. Politika ida ne’e implementa duni.
Sekretáriu Estadu Kooperativa, Arsénio Perreira da Silva hatete, SEKoop la estende funsionariu kazual sira-nia kontratu ne’ebé remata iha fulan Juñu no fulan Agostu ne’e.
“Sira ne’ebé mak kontratu remata iha 30 Juñu ne’e automatikamente sira hotu ona. Agora sira ne’ebé ke to’o iha 31 Dezembru ne’e tanba kontratu bazeia ba programa, atividade governu anterior nian, tanba ida ne’e kuaze 143 mak sei para iha fulan ida ne’e, 31 Agostu remata sira-nia kontratu, depois orsamentu retifikativu aprova mak foin rekruta foun,” dehan Arsenio ba Jornalista Jornal INDEPENDENTE, iha Ministériu Finansas, Tersa (01/08).
Funsionariu kazual ne’ebé ninia kontratu remata, nia dehan, bele kontinua no bele mós lae. Depende ba avaliasaun no sira-nia professionalizmu servisu.
Ba sira ne’ebé ninia kontratu sei la estende, Arsenio dehan, nia fó alternative ida, katak sira bele loke kooperativa no SEKoop sei fó apoiu ba sira.
“Hapara mais ha’u fó alternative, laos hapara loos de’it, ha’u fó alternativu, tanba sira komprende ona saida mak kooperativa, entaun ha’u fó dalan par sira halo kooperativa, depois sekretariu estadu sei apoia finanseira ho formasaun ba sira par sira-nia dezenvolvimentu kooperativa bele lao.”
Formasaun ne’ebé SEKoop sei oferese, nia dehan, depende ba sira-nia pedidu.
