Nia dehan, ba vitima sira husi dezastre naturais, dadauk ne’e balun hela ho familia. Tan ne’e bainhira governu halo ona levantamentu, sei rekopera fali sira nia hela fatin.
“Protesaun Sivil apoiu ona sasan umanitariu, maibé ba apoiu rekoperasaun, governu halo hela levantamentu dadus, bainhira remata bele taka fila-fali sira nia uma ne’ebé hetan estragus,”dehan nia ba Online INDEPENDENTE, foin lalais ne’e.
Nia hatutan, tuir dadus, aldeia iha Suku Ossu de Cima hamutuk ualu (8), kompostu husi aldeia Belas, Oelara, Bakasi, Oebuti, Liamidar, Oeriku, Oleriu no Larigutu, ho nia populasaun hamutuk 4.416 no uma kain 1.117.
Entretantu, molok ne’e, Autoridade Protesaun Sivil relata liu husi konferensia imprensa katak, durante dezastre naturais ne’ebé akontese iha fulan-Janeiru tinan ne’e nia laran, total uma kain 399 mak hetan estragus, hanesan anin-boot estragus uma hamutuk 375, rai halai estragus uma 8, ahi-han uma 16, Ema na’in rua mate rezulta husi mota lori no rai lakan.
