Ministru Prezidensial Konsellu Ministru, Fidelis Leite Mangalhães, hatete, alterasaun dekretu lei ne'e hodi bele garante pagamentu subsidiu refere ba reklamante sira ne'ebé hato'o ona sira nia reklamasaun ne'ebé aprezenta no aseita husi komisaun pagamentu.
“Objetivu husi projetu Dekretu Lei ne'e atu alarga períodu pagamentu to'o loron 30 fulan-Abril tinan 2023. Ida ne'e atu fasilita governu tenki halo melloramentu, halo ajustamentu sira liliu atu halo avansa ho hirak ne'ebé verifikadu katak iha duni direitu, maibé lakonsege hetan," dehan Fidelis iha Palasiu Governu, Kuarta (01/02).
Governante ne’e dehan, sei hanaruk mós, to'o loron 30 fulan-Juñu tinan 2023, prazu atu entrega ba KM husi relatoriu ezekusaun diploma nian, husi parte MSSI nian ne'e.
Entretantu, molok ne'e Vise Primeira Ministra no Ministra Solidariedade Sosial no Inkluzaun, Armanda Berta dos Santos hatete, pagamentu ba subsidiu $200 finaliza ona iha 6 Janeiru 2023.
Tuir dadus ne'ebé MSSI iha, nia hatutan, iha uma-kain rihun 28 mak sai reklama tanba sira-nia naran laiha iha lista pagamentu subsidiu $200.
"Iha dekretu lei ne'e laiha reklamante, ne'ebé ko'alia ona ho Primeiru Ministru oinsa par atu bele haré fali ida ne'e, atu rezolve fali ba sira ne'ebé reklamante, se iha dalan atu rezolve ita bele halo, se laiha, ita pasiensia," tenik nia.
