Tuir komunikadu ne’ebé Online INDEPENDENTE asesu iha pajina gabineti MSSI, relata, delegasaun ekipa téknika husi Portugal, iha loron 31 fulan-Janeiru 2023, vizita no haree ona rai ne’ebé identifikadu husi Autoridade Munisípiu Ainaro rasik, hodi nune’e ekipa bele halo estudu viabilidade no iha futuru bele hari’i ona sentru refere.
Enkuantu, sentru refere, hari’i ho objetivu ida atu halo atendimentu integradu ba komunidade sira ne’ebé iha situasaun frajilidade, liu-liu ema ho defisiénsia, labarik no feto sira ne’ebé hasoru violénsia domestika no violénsia bazeia ba jéneru, labarik no joven ne’ebé hasoru problema justisa no sira hotu ne’ebé moris iha situasaun vulnerabilidade nia laran.
Iha biban ne’e, Sekretária Administradór Munisípiu Ainaro, Rosa Olga Mendonça hateten, nuudar Autoridade Munisípiu Ainaro kontente no apresia tebes ho programa ida ne’e, tanba ba oin bele hari’i sentru ida hodi fasilita idozus, defisiénsia no Joven sira ne’ebé hetan problema sosiál inklui feto sira ne’ebé hasoru problema violénsia domenstika no violénsia bazeia ba jéneru. Nune’e bele tau iha fatin ida hodi governu bele tau matan ba sira.
“Ita identifika ona rai estadu hamutuk hektares 4, ne’ebé la iha problema no fiar katak ba oin governu, liu husi MSSI bele halo ona sentru ida ne’e, atu nune’e bele fasilita komunidade sira ne’ebé vulneravél iha Timor-Leste, liu-liu iha Munisípiu Ainaro rasik,” katak Sekretária Administradór Munisípiu Ainaro, ne’ebé Online ne’e sita.
Nune’e mós Diretór Gabinete Estratéjia Plañeamentu-Portugal, José Luís Albuquerque hateten, Ministériu Traballu Portugal iha komitmentu atu apoiu Timor-Leste, liu husi servisu hamutuk ho MSSI hodi hari’i sentru rehabilitasaun integradu ida ba komunidades iha Munisípiu Ainaro, liu-liu ba sira ne’ebé vulneravél.
“Portugal sei apoiu ekipamentus sosiál hotu-hotu inklui kapasitasaun no formasaun ba iha rekursus humanus ne’ebé atu hala’o servisu iha sentru refere”, tenik Diretór Gabinete Estratéjia Plañeamentu-Portugal.
Entretantu, vizita ne’e akompaña husi, Administradór Postu Ainaro, Xefe Suku Ainaro, Diretór Jerál Solidariedade Sosiál no Inkluzaun, Diretóres Nasionais no Xefes Departamentu, Diretór MSSI Munisípiu Ainaro no Diretóra Jerál CNR.
