Tuir komunikadu ne’ebé Online INDEPENDENTE asesu, iha pajina ofisial MTKI, relata, Oitavu Governu Konstitusionál husi tinan-2021 iha Diresaun Nasionál Komérsiu Internu MTCI hari Loja do Povo, hamutuk tolu ne’ebé governu kontrata ho empreza ka grupu ho orsamentu kada Grupu/empreza ho orsamentu US$50.000, hanesan Cesaria Lari Tame Unipessoal Lda–Grupu Kooperativa Campones Maubere (CCM) estabelese iha kapital Díli, Kooperativa MultiSectoral-Empreza Monica do Santos Unipessoal Lda estabelese iha munisípiu Ainaro.
Aleinde, Kooperativa Mua Tchau-Cipriano Feliz Unipessoal Lda estabelese iha Lautem.
Enkuantu, iha tinan-2022 MTCI asina akordu kontratu ho empreza ka grupu 4 ho valor orsamentu kada ida US$50.000. grupu sira ne’e hanesan Casa Nova Fresca, Unipessoal Lda-Grupu Comvaça estabelese iha Díli, Hibahitirokap Nunes Unipesial Lda–Grupu Produtores Same, Putri Lialuli Unipessoal Lda iha Cavalima no Maubere Spirit Unipessoal Lda estabelese iha Baucau.
Husi grupu haat ne’e preve ona katak sei lansa iha primeiru trimester no husi grupu hirak ne’e hetan ona formasaun.
“Ida ne’e atu responde maluk agrikultór ne’ebé produz, maibé agrikultór sira dala ruma lamenta ho merkadu, tanba ne’e ho estabelesementu Loja do Povo oinsá atu simu produtu lokál husi povu sira hodi fa’an fila. Ida ne’e faze ida husi governu loke espasu merkadu ba povu agrikultór sira, hodi fa’an sira nia produtu,” hatete Ministru MTKI, José Lukas iha komunikadu ne’ebé Online ne’e sita.
Tan ne’e, Ministru husu mós ba kompaña rua ne’ebé mak asina ona kontratu ho Ministériu atu asumi responsabilidade hanesan timoroan atu konsidera agrikultór ho grupu hotu-hotu.
Entretantu, tuir planu, iha tinan ida ne’e, MTKI tau ona orsamentu ho montante US$250.000 ne’ebé sei estabelese loja do povu iha munisípiu sira hanesan Aileu, Ermera, Bobonaro, Líkisa no Vikeke.
