“Objetivu husi laboratoriu ne’e, atu fasilita formasaun ba manorin no estudante atu aumenta sira nia koñesimentu no abilidade iha área ICT, tanba mundu agora iha era dijitalizasaun ona,”dehan Ministru Edukasaun Juventude no Desportu, Armindo Maia, iha edifisiu ESJ 04 Setembru UNAMET, Balide, segunda (30/01).
Nia dehan, ba eskola sira iha Kapital Dili, foin mak eziste laboratorium ICT iha ESJ 04 UNAMET ne’e, maibé la'os benifisia de'it ba eskola ida ne'e, eskola sira seluk mós persiza hetan hotu.
Ho nune’e, ba ezistensia laboratorium ICT, Governante ne’e husu ba estudante no manorin sira ne'ebé hetan oprtunidade ida ne'e, aproveita uza ba ho kuidadu, tanba ninia benifisiariu boot tebes ba estudantes sira, no asesu laboratoriu ICT la'os baratu maibé persiza osan boot.
Ministru haktuir, mundu agora dijitalizasaun tebes, hotu-hotu tenki aprende ICT, tanba Timor lakleur tan tama ona ba ASEAN, ne'e oportunidade boot ba TL oan, se la avansa hanesan nasaun seluk mak Timor sei hela iha kotuk.
Iha fatin hanesan, Representante UNDP iha Timor-Leste Munkhtuya Altangerel, hato’o agradese ba Governu TL, ba apoiu ne’ebé fó liu husi MEJD, iha UNDP nia komprimisiu hamutuk MEJD atu avansa dijitalizasaun ba setor edukasaun iha TL.
"Modelu padraun husi laboratoriu no fasilidade hijiene ida ne'e, parte ida nudar ami nia apoiu integradu husi MEJD iha ámbitu projetu kompetensia no koñesimentu ICT ba joventude TL," nia haktuir.
Munkhtuya esplika, antes ne'e UNDP apoiu uluk ona laboratoriu ho komputador ba eskola 4 iha Rejiau Autonomo Especial Oekusi Ambeno (RAEOA), ne'ebé fó benifisiu ba estudante rihun 5 resin.
Aleide, renova laboratoriu ICT iha ESJ 04 Setembro UNAMET, UNDP mós rehabilita laboratoriu ICT iha Eskola Tékniku Vokasionál (ESTV) Manatutu ne'ebé tempo badak sei inagura.
Enkuantu, Total orsamentu ne'ebé MEJD ho UNDP gasto ba laboratoriu refere ho nia ekipamentus ho montante hamutuk dolar amerikanu tokon $300.
