“Ita asina kontratu ho kompañia rua ne’e para halo servisu melloramentu sistema bee moos iha Postu Administrativu Ossu, Munisipiu Vikeke no Postu Administrativu Zumalai, Munisipiu Kovalima nian, projeitu ida ne'e ho durasaun fulan neen, espera katak depois de fulan neen, ita nia komunidade sira bele asesu ona bee moos ho di'ak,”dehan Prezidente BTL,EP, Carlos Peloi, iha edifisu BTL, EP, Kaikoli, segunda (30/01).
Nia dehan, orsamentu ba projetu melloramentu sistema bee moos iha Postu Administrativu Ossu Munisipiu Vikeke hamutuk dolar amerikanu $ 421,903,57 no fontes bee ne’ebé kanaliza ba postu refere mak bee matan Wai-Kirona ne’ebé lokaliza iha iha Monte Perdidu no bee matan Waibua.
Iha Postu refere, sistema bee moos sei benifisia ba populasaun hamutuk 2.850 no sei sei fornese mós ba instituisaun hamutuk 14, hanesan postu saúde, eskola, dormitoriu no igreja.
Aleinde ne’e, sistema bee moos rasik, sei transforma ba sistema urbana, iha ne’ebé sei instala mós metro kontadór ba benifisiariu uma-kain 475.
Ho nune’e, ba projetu sistema bee moos ne’ebé sei fornese ba iha Postu Administrativu Zumalai, Munisipiu Kovalima sei gasta orsamentu hamutuk dolar amerikanu $ 419.349,04 no fonte ba bee moos mai husi bee matan Sumaloi (Gravitasaun). Enkuantu, sistema bee moos ida ne’e sei monta mós kontador unidade 630 ba uma-kain hamutuk 3.780 no sei fornese mós ba instituisaun 10 hanesan, postu saude, igreja no eskola.
Kompañia rua ne’ebé hetan kontratu husi BTL,EP hodi forsene bee moos ba komunidade iha Postu rua ne’e mak hanesan, Kompañia CDFG Unipesoal Lda no Mamatelu Tuniva Unipesoal Lda.
Iha parte hanesan Diretór kompanñia Mamatelu Tuniva Unipesoal Lda, Osvaldo Tavares, hatete, hanesan kompañia manan na'in, prontu atu bele ezekuta obra ida ne'e tuir tempu ne'ebé estabelese ona.
Entretantu, Administradór postu-administrativu Ossu, Sebastião Ferreira Pires, sente kontente no agradese ba VIII Governu, liu-liu BTL, E.P tanba bele aprova ona proposta, atu kanaliza bee ba komunidade sira, liu-liu hodi rezolve problema bee moos iha Ossu.
