Diretór ESJ 05 de Maio, Adelino Nicolau Ornai, hatete, eskola refere prosesu aprendizajem ba ano letivu 2023 hahú ona iha loron 16 Fulan-Janeiru maibé sala de aula inklui fasilidade sira seluk mós la sufisiente.
"Prosesu Aprendizajem la'o normal hela, maibé sala de aula no fasilidade sira seluk hanesan meza no kadeira mak la sufisiente tanba estudante kuantidade boot tebes," dehan nia ba Online INDEPENDENTE, iha nia knar fatin Bekora, kinta (02/02).
Nia esplika, prosesu aprendizajem fahe ba tornu rua dader no lokraik tanba sala de aula iha sanolu-resin-tolu de'it.
"Antes ne'e eskola fahe ba tornu tolu dader meudia no loraik, maibé tanba programa bolsu méritu, governu liu husi Ministeriu Edukasaun Juventude no Desportu (MEJD) bandu atu eskola refere labele iha tornu tolu tenki iha rua de'it," tenik nia.
Nia haktuir, antes ne'e meza ho kadeira sira ne'ebé aat inan-aman husi estudate sira fó kontribiusaun hodi hadi'a hotu ona maibé la sufisiente nafatin.
Tanba ne'e eskola hato'o ona pedidu ba MEJD hodi reforsa tan meza ho kadeira maibé pedidu refere seidauk iha resposta.
"Ami mós hato'o ona ami nia pedidu ba Edukasaun Munisipiu atu reforsa tan meza ho kadeira 100 mai ami, hodi ami nia estudante sira uza, maibé edukasaun munisipiu ho razaun dehan kontrusaun sala foun ne'e hotu lai mak hafoin haruka meza ho kadeira mai tan," katak nia.
Enkuantu, dadauk ne'e, estudante sira uza de'it kadeira masa hodi tuir prosesu aprendizajem.
Entretantu, total estudante iha ESJ 05 de Maiu hamutuk 1.716, kompostu husi désimu ano 461, désimu Primeiru ano 584 no désimu segundu ano 671.
