“Fase ran nia kauza iha buat lima mak hanesan ran midar, tensaun, rins, poliquistiku, obsturksaun, no mós moras primária sira. Entaun, moras ne’e mak predomina lori pasiente ne’e to'o hetan rins avansadu,” Espesialista Neofrolojia iha HNGV, Gustavo Rosario da Cruz hateten ba jornalista, Kinta (02/02/2023).

Iha fatin hanesan, pasiente fase ran Anita Sarmento hateten ninia moris ne’e depende bá mákina tanba nia fase ran desde tinan 2012 to’o ohin loron.

"Primeiru ha'u bá klinika Bairru-Pité koko tensaun sa’e makas ba 150. Iha ne'e kedan sira transfere ha'u mai iha HNGV, depois doutór sira koko detekta ha'u moras rins no  kronis tebes. Tanba ne'e hau fase ran to’o ohin loron no hau nia moris depende deit ba mákina,” nia hateten.

Husu ba maluk sira ne'ebé hetan moras rins karik, tenke mai fase ran, labele tauk maibé hakbesik an mai iha ne'e atu bele hetan atendimentu, tanba iha ne’e atendimentu diak tebes.

Iha fatin pasiente Bartolomeo Maria Ferreira hateten, nu’udár pasiente fase ran husu ba maluk sira ne'ebe mak hetan moras rins la bele tauk maibé tenki mai iha HNGV hodi hetan diagnostika husi doutór sira.

Maski nia fase ran semana ida dala tolu maibé nia la tauk tanba nia fiar katak to’o tempu ruma sei diak importante mak halo tuir saida mak médiku sira hateten.