Prezidente Komisaun A PN, Joaquim dos Santos hatete, komisaun A aprovasaun pareser proposta lei eleisaun parlamentu nasional no sei haruka ba meza parlamentu nasionál.

“Horsida lokraik haruka ba Prezidente Parlamentu atu ajenda ba segunda. Iha alterasaun lubuk ida,” dehan nia, iha Parlamentu Nasionál, horisehik.

Deputadu Joaquim dehan, liu-liu substansiál atu haree situasaun ba sidadaun sira iha estrajeiru atu bele partisipa eleisaun ida-ne’e ho diak, depois atu kria kondisaun defisiensia matan, tanba dadus ne’ebé mak iha maijumenus munisipiu purvolta ema nain 300 resin votantes.

“Entaun ne’e governu tenke rekonese mós sira, sira defisiente tilun, ida ne’e labele ajuda ho asistente sira desde ke lei autoriza, maibé sira ne’ebé mak defisiente matan mak komisaun deskute, governu tenke kria kondisaun ba ida-ne’e,” Joaquim informa.

Nia haktuir, ida ne’e mak problema ida, komisaun levante no husu ba parlamentu nasionál atu bele aprova atu governu implementa.

“Problema ida mak komisaun foti iha eleisaun parlamentár atu ajusta ho prosesuais ne’ebé hanesan foin lalais eleisaun prezidensiál, depois sei aumenta estasaun votus, tanba populasaun numeru aumenta,” Joaquim informa.

Nia haktuir, depois haree mos problema barreira ninian, atu mantein ka sa’e,  maibé ida problema ne’ebé foti iha audiensia, komisaun relata ba parlamentu atu iha espesialidade bele konsidera, maibé se konsidera, komisaun bele diskuti, see la konsidera, komisaun la hatama.

“Depois problema seluk kona-ba fiskais, tanba aumenta sentru votasaun no estasaun votus,  partidu sira mós tenke iha fiskais atu kobre, ultimo dadus ne’ebé governu relata katak sei aumenta estasaun votus,” nia informa.

Joaquim argumenta, kuandu aumenta sentru votasaun kada estasaun ema nain rua, entaun  partidu sira tenke prepara ema nain-rua,  purezemplu 1500 estasaun votus, entaun partidu tenke prepara ema 3.000  ba fiskais.

“Ida ne’e mós problema ida ne’ebé iha diskusaun espesialidade mak ita haree, maibe importante mak audiensia nia rezultadu rejistu hotu, ohin ita komisaun aprova ona relatóriu paresér no haruka ba meza parlamentu nasionál, atu ajenda ba proximu semana,” nia hateten.

Joaquim fundamenta, projetu-lei ne’e iha artigu lima deit, ne’ebé la barak, se parlamentu nasionál aprova jeneralidade iha  proximu semana, depois tama kedas espesialidade nian.

“Tanba lei ne’e parlamentu nasionál konsidera urjente, komisaun tau hanesan primeiru prioridade,” nia haktuir.

Kalendáriu Resenseamentu Eleitorál Rai-Li’ur

Konsellu Ministru (KM) aprova kalendáriu operasaun ba resenseamentu eleitorál iha rai-li’ur, Dekretu Governu ne’e husi Ministru Administrasaun Estatál (MAE), Miguel Pereira de Carvalho.

"Konsellu Ministru mós aprova dekretu Governu ba kalendariu operasaun ba resenseamentu eleitoral iha rai li'ur," dehan niaMinistru Prezidensiá Konsellu Ministru (MPKM) Fidelis Manuel Leite Magalhaens hafoin reuniaun KM iha Palásiu Governu, Kuarta (1/2).

Nia dehan, formasaun ba membru sira Komisaun resenseamentu Eleitorál sei hala’o iha 22 to’o 23 Fevereiru 2023, inskrisaun ba resenseamentu eleitorál sei hala’o entre loron 24 Fevereiru to’o 24 Marsu 2023. 

Elaborasaun, extrasaun no remesa ba lista eleitór sira, liu husi via eletrónika, husi misaun diplomátika sira no postu konsulár ida-idak sei hala’o iha 25 to’o 26 Marsu.

Períodu espozisaun no reklamasaun ba lista eleitór sira ne’ebé hela iha rai-li’ur ne’e define ba períodu husi 27 to’o 31 Marsu no sinkronizasaun sistema resenseamentu eleitorál sei hala’o entre loron 1 to’o loron 11 fulan-abril.

Ikus liu, númeru sira ne’ebé inskritu iha resenseamentu eleitorál tenke publika to’o 12 Abril 2023.