Ministru Edukasaun, Juventude no Desportu, Armindo Maia hatete, MEJD forma ona ekipa ida atu atende ba rekalamasaun ba eskola sira iha nivel sentral no munisipal atu nune'e bele rezolve kestaun sira ne'e.

"Tanba ita hatene katak ema barak mak deskonfia manipulasaun valor iha eskola sira no sai preokupasaun boot ba inan-aman sira, tanba ne'e ita forma ona ekipa ida hodi tuun ba atende reklamasaun atu nune'e bele hatene katak manual ne'e loos ka lae, ida ne'e mak ita sei buka hodi rezolve," dehan Armindo iha palasiu governu, Kuarta (01/02).

Molok ne’e, Prezidente Komisaun G Parlamentu Nasionál trata asuntu Edukasaun, Juventude, Kultura no Sidadania, Antonio Verdial de Sousa husu Ministériu Edukasaun Juventude no Desportu kansella bolsa méritu, tanba konsidera mosu manipulasaun naran iha eskola sira.

Prezidente Komisaun G ne’e hatete, tuir informasaun ne’ebé nia parte simu eskola balun halo manipulasaun ba valor estudante sira nian.

“Bolsa méritu ne’e favór boot ida hatete ba Ministru Edukasaun, se bele kansella lai,” dehan nia iha PN, Tersa (31/01).

Tuir nia, estudante sira ne’ebé merese hetan bolus meritu ne’e mak tama iha klasifikasaun dahuluk, daruak no datoluk, maibé realidade mosu manipulasaun ba ida ne’e.

“Presiza tebes Ministériu Edukasaun halo identifikasaun ne’ebé mak klaru,” nia husu.

Iha fatin hanesan, Deputadu Bankada CNRT, Oscar de Araujo hatete, nia iha prova kona-ba manipulasaun iha bolsa méritu.

“Iha Ensinu Sekundariu Jerál Fernando La Sama, merese atu hetan bolsa méritu, mak alin oan naran Rivaldo, nia valor total 51 ho tan nia kolega sira seluk, maibé to’o iha publikasaun na’in hira ne’ebé mak merese, valor 51, 49, 48 ne’e la hetan bolsa meritu.”

“Maibé ida hetan fali nia valór 33, no valór 32 mak hetan fali primeiru klasifikasaun hodi hetan direitu bolsa meritu ne’e, tanba ne’e husu ba Ministériu Edukasaun atu haree didi’ak distribuisaun bolsa méritu ida ne’e,” nia hatete.

Tuir deputadu ne’e, bolsu meritu ne’e atu intensiva no motiva estudante sira, la’os atu fó fali ba sira ne’ebé mak la merese.

Deputada Bankada Fretilin, Josefa Álvares Pereira hatete, presiza kansela duni bolsu méritu ne’e hodi buka hatene razaun eskola sira troka estudante sira ne’ebé hetan valor di’ak.

“Dala-ruma Diretór sira ne’e la komprende kona-ba bolsa méritu nia objetivu, halo fali buat sira hanesan bolsa da mãe,” dehan nia.

Vise Prezidente Bankada Fretilin, Antoninho Bianco hatete, bolsa meritu ne’e tenke halo inkeritu hodi hatene loloos.

“Ita lalika ko’alia tenke inkeritu iha nasionál ne’e depois ita haree,” dehan nia.

Estudante Bobonaro Rihun 1 Resin Hetan Valor As

Entretantu, Diretór Edukasaun Munsisipiu Bobonaro, Crispin Lopes Moniz informa, nia parte submete ona dadus estudante kuaze na’in 1.259 ne’ebé hetan klasifikasaun aa iha tinan 2022 hodi asesu bolsa meritu.

"Ami submete tiha ona dadus ba ita-nia estudante mellor klasifikadu sira ba iha MEJD, atu nune'e assesu ba iha bolsa meritu, tanba ne'e ita hein de’it tempu badak governu sei transfer osan ba estudante idaidak nia konta bankaria," dehan nia via telefone, Kinta (02/02).

Entretantu, Ministru Edukasaun, Juventude no Desportu, Armindo Maia hatete, iha semana oin  estudante mellor klasifikadu sira sei asesu bolsa meritu.

“Ita garantia katak semana oin ita-nia estudante mellor klasifikadu hamutuk 12 mill resin, sei assesu ona ba bolsa meritu," dehan Nia.

Ba implementa bolsa meritu ne’e, nia dehan, MEJD preve orsamentu hamutuk  millaun $7.2.