Komunidade aldeia Limanaro bairru Bia Hedan, DiamantinoValente Xavier hateten, desde tinan 1993 komunidade uma kain hitu hela ona iha aldeia refere, to’o Timor-Leste ukun an komunidade hirak ne’e seidauk sente dezenvolvimentu.
“Ami sente triste tebes durante ne’e ema seluk mak gojaEestadu nia dezenvolvimentu ida ne'e, maibé ami uma kain hitu husi bairru Biahedan seidauk asesu eletrisidade,” nia hateten ba Independente, Sesta (04/11/2022).
Familia hitu ne’e la hatene razaun saída mak seidauk bele asesu tanba maioria komunidade aldeia refere 95% asesu ona liña eletrisade.
“Agora Governu realiza programa UKL ha ne’e, iha hela faze konstrusaun, maibé liña eletrisdade mos la tama, ami sente konfuzaun tanba molok ne’e kompañia dada rin eletrisidade maibé la liu mai ami nian,” nia afirma.
Komunidade ne’e husu ba ministeriu relevante atu tau preokupasaun komunidade uma-ka’in hitu ne’e ba lista, no husu klaru ba kompañia tanba saída mak uma ka’in hitu ne’e abandona de’it.
Iha fatin hanesan, Xefe Aldeia Limanaro, Aleixo Mauloe Tavares, sente preokupa tebes ho kondisaun populasaun uma-ka’in hitu ne'ebé daudaun ne’e seidauk asesu ba liña eletrisidade, tanba kompañia Havana dada eletrisidade la to’o.
Maski nune'e, komunidade sira sei utiliza hela solar panel hodi fasilita netik iha tempu kalan, nune’e bele mós apoia oan sira estuda.
Kona-bá preokupasaun ne’e, Xefe suku Rairobo Pedro Leitao Afirma, liña eletrisidade iha suku Rairobo atinje ona pusentu 95, ne’ebé iha aldeia Limanaro ne’ebé kompostu husi populasaun uma ka’in atus ida resin hetan hotu ona eletrisidade, maibé uma kain hitu ne’e de’it mak seidauk.
“Ami rekomenda nafatin ba parte Governu no halo nafatin proposta atu haree hotu populasaun nia preokupasaun prioridade liu mak komunidade uma kain hitu ne'e, bele asesu hotu ba lina eletrisidade,” nia subliña.
Iha suku Rairobo ne’e rasik kompostu husi aldeia 4 mak hanesan Limanaro, Rairobu, Faturase no Vila Maria.
Husi aldeia hirak ne’e kompañia Havana mak manan tenderizasaun husi Governu ba instalasaun lina eletrisidade iha 2011.
Maibé bainhira monta besi ba komunidade nia uma hodi dada eletrisidade laiha liña koordenasaun di’ak, entaun komunidade uma ka’in-hitu ne’e la asesu ba eletridade to’o ohin loron.
