“Iha tempu bai-loron ami konsumu be'e iha fatuk kuak ne’ebé ami tenke la’o ho distánsia dook tebes kuaze kolometru lima hodi kuru," Komunidade, Zeka Barreto hateten iha aldeia Durubasa, Sesta (04/11/2022).
Iha fatin hanesan, Xefe aldeia Durubasa, Filomena da Cruz hateten, Iha tempu Indonezia iha ona kanalizasaun maibé kanu sira tohar hotu tanba komunidade rasik ne’ebé laiha responsabilidade mak estraga tiha nune’e be'e la konsege to’o iha komunidade nia leet.
Autoridade Komunitáriu husu ba governu atu tau prioridade ba asuntu be'e-moos ba komunidade iha área rurais.
Iha aldeia Durubasa total uma-ka’in 75 mak seidauk asesu ba be'e-moos.
Kondisaun Estrada A'at
Komunidade iha aldeia Durubasa mós enfrenta difikuldade hanesan kondisaun estrada a'at no la konsege lori produtu lokál ba merkadu iha Díli.
Xefe aldeia Durubasa Felomena da Cruz hateten, iha tempu udan boot estrada kuak no tahu makaas movimentu publiku paradu.
"Tanba komunidade sira lalin sasan hanesan produtu lokal ho distansia dook tebes no kilometru haat atu lori ba tau iha estrada boot depois mak transporta ba merkadu iha Dili," nia hateten.
Tanba ne’e husu ba governu liu husi Ministeriu Obras Publiku (MOP) atu tau matan ba estrada nune'e karreta ba to'o komunidade nia uma hodi lori produtu lokal ba merkadu.
