Tuir informasaun, iha Segunda kalan, Padre Abito José Carmeno Brites, haruka mensajen ba feto ida ho inisial MSR, atu ba haan ho nia iha restaurante ida iha Dare.

MSR aseita ho konvite husi Padre Abito no sira na’in rua uza motor marka Jupiter ho xapa matrikula E.8081, aranka Dare. Padre Abito mak kondus motor ne’e.

Maibé iha dalan klaran tanba rai nakukun ona, Padre Abito ho MSR deside hodi fila mai Dili.

“Sira na’in rua fila fali mai to’o iha dalan foun husi Dare nia tuun mai liu husi Mahoka nia uma leten ne’e mak halai sees, entaun soke penahan no sira monu ba baleta kuak. Sira na’in rua uza kapasete dala-ruma kapasete la metin, entaun kapasete semo sai, baku ulun ba troatoar balun iha ne’eba, entaun iha ne’e mak pandaka maka’as,” informa Xefe Seksaun Polisia Tranzitu Munisipiu Dili, Inspetor Domingos Sarmento Gama, iha Komando PNTL Dili, Kaikoli, Tersa (23/08).

Iha asidente ne’e, nia dehan, Padre Abito sofre kanek grave iha ulun, enkuantu MSR sofre kanek kaman.

Hafoin asidente ne’e, nia hatete, konsege evakua Padre ho MSR ba Hospital Nasionál Guido Valadares, maibé Doutor sira la konsege salva padre nia vida.

Ba MSR, nia hatete, daudauk ne’e fila ona ba nia rezidensia no parte investigadór to’o ona iha MSR nia uma maibé tanba sei sente moras nune’e seidauk bele tuir prosesu investigasaun.

“Ita husu nafatin (MSR) sei apresenta an par depois ita foti deklarasaun, maibé ita mós la taka dalan, karik iha momentu asidente iha sasin ruma mak haree karik atu aprezeta hodi nune’e ita foti mós deklarasaun par kompleta kona-ba asidente refere," nia hatete.

Iha fatin ketak, Vigariu Episcopal  ba asuntu Pastoral Arguedioseze  Dili, Padre Juvito do Rego hatete, bazeia ba informasaun husi MSR, Padre Abito halai neneik.

Tan ne’e, Vigariu ne’e prefere atu halo autopsia atu familia no Padre sira bele hatene loloos kauza husi Padre Abito nia mate.

Nia dehan, husi parte Dioseze nian foti ona desizaun atu husu ba autoridade hodi halo autopsia.

“Ohin (horseik) dadersan ida ne’e tuir nia prosedimentu hein husi Ministeriu Publiku hatun despaixu mak foin bele halo autopsia no daudaun ne’e sei halo autopsia,” katak nia.

Bainhira prosesu autopsia remata ona, Amu Juvito hatete, mate-isin sei hatoba iha Seminariu Maior Fatumeta ne’ebé durante ne’e Padre Abito haknar an ba.

Padre Abito moris iha 6 Fevereiru 1985 iha aldeia Ailelo, Postu Administrativu Hatulia, Munisipiu Ermera. Oan dahaat husi maun-alin na’in 10 husi Jeferino Casimiro no Saturnina Martins.

Abito simu ordenasaun nu’udar Amu Lulik iha 27 Marsu 2018 iha Igreja Gleno, Ermera.