Kordenador Forsa-Tarefa Prevensaun no Mitigasaun Surtu Covid-19 iha Timor-Leste no Sentru Integradu Jestaun Krize (SIJK), Rui Maria de Araújo informa, kazu konfirmadu foun 4, ema hirak ne’e husi Aldeia Klau halek, Suku Belulik Leten, Postu Administrativu Fatumean, Munisipiu Kovalima.
Nune’e, kazu ne’ebé deteta hahú husi amostra rastreiu ka screening ne’ebé foti iha loron 20 fulan Fevereiru 2021.
“Kazu sira iha leten hatudu transmisaun lokal husi posivelmente kazu “importadu klandestinamente’’ husi populasaun ne’ebé tama sai fronteira, no ekipa vijiánsia epidemiolójika ho ekipa laboratóriun nafatin buka tuir kontaktu sira hodi halo análiza ba sira nia amostra,” dehan nia liu husi Konferensia Inprensa, iha CCD, Merkadu Lama (23/02).
Nia dehan, hafoin, iha loron 23 Tersa, ekipa vijilánsia epidemiolójika buka tuir ema hirak ne’ebé pasiente hirak ne’e halo kontaku, no to’o loraik hamutuk ema na’in 29 kompostu husi membru familia 13, viziñu na’in 16, no na’in tolu 3 ne’ebé positivu tan, ida membru familia, nain rua seluk vizinu.
Haree husi nivel alerta no resposta ne’ebé Governo Timor-Leste adopta ba prevensaun no mitigasaun Covid-19 iha Timor-Leste, hahú ohin loron 23 Tersa fulan Fevereiru 2021, Timor-Leste tama fali faze ne’ebé hanaran ALERTA ka faze mitigasaun.
Nune’e serka Sanitária sei matein nafatin, tuir rezolusaun governu nº4 & nº5, 15 Fevereiru 2021, kazu foun 4 ne’e oras ne’e dadaun Servisu Ambulánsia ba foti atu lori mai izolamentu iha Vera Cruz.
koordenador ne’e husu ba públiku atu nafatin kumpri regras sira ne’ebé maka Ministériu Saúde hatur ona, no husu atu komunidade hamri’ik do’ok husi ema seluk, minimu metru ida ho balun, kumprimenta malu la presiza bensa-liman, la presiza kaer-liman, la presiza haku’ak-malu ka rei-malu, uza maskara, fase-liman beibeik ho sabaun, uza dezinfetante liman-nian, la presiza sai husi uma, bainhira la presiza tebes.
“Bainhira ita hotu hala’o ho disiplina buat hirak, hanesan temi iha leten, ita hotu sei kontribui atu ita nia an-rasik, ita nia familia no viziñu sira iha ita nia bairru ka ita nia servisu-fatin, no mós Timor-Leste tomak, nafatin dook husi moras Covid 19,” nia informa.
Iha biban ne’e mós nia apelu ba iha rezultadu jeral kona-ba screening ne’ebé halo iha Munisipiu Covalima, Bobonaro inklui RAEOA, nuen’e iha munispiu Bobonaro totál amostra 1022 no 100% negativeu, husi Munisipiu Kovalima totál amostra 851 husi númeru ne’e pozitivu 4, negativu 847 amostra (99%), iha RAEOA totál amostra 252 no 100% negativu.
“Rastreiu sei nafatin hala’o to’o dia 25 Fevereiru iha Kovalima no Bobonaro, hodi bele kobre Postu Administrativu sire ne’ebé seidauk kobre, nune’e mos ho RAEOA, ne’ebé sei hala’o to’o dia 27 Fevereiru,” hateten nia.
Nia dehan, maske kazu foun hirak ne’e hatudu , iha agrupamentu ida ka “ cluster’’,iha aldeia Klau halek, Suku Belulik Leten, Fatumean, no hatutu katak iha transmisaun lokal, iha fatin ne’ebá Sentru Integradu Jestraun Krize kontinua apelu ba populasaun tomak, atu nafatin kalma, labele pániku, no buka kumpri nafatin ho disiplina ne’ebé maka MS hatur ona.
