TL Sosa Asaun ConocoPhillips Tokon $350 Featured

By INDEPENDENTE Outubru 05, 2018 2587
Ministru Estadu Prezidensiál Konsellu Ministru, Hermenegildo ‘Agio’ Pereira Ministru Estadu Prezidensiál Konsellu Ministru, Hermenegildo ‘Agio’ Pereira

DILI: Estadu Timor-Leste sosa ona asaun kompañia Joint Ventura ConocoPhillips porsentu 30% ho montante tokon $350. Iha prosesu ne’e Timor GAP maka sei parte iha joint ventura liu husi up stream asaun nian.

Ministru Estadu Prezidensiál Konsellu Ministru, Hermenegildo ‘Agio’ Pereira hateten, ConocoPhillips hola parte ba joint Ventura ba kampu Greater Sunrise, nune’e Governu Timor-Leste defende maka’as atu dada kadoras mai Timor.

Kompañia joint Ventura komersialmente rejeita kadoras mai Timor-Leste, tanba mosu diferente opiniaun entre joint Ventura ho Estadu Timor-Leste Ne’e duni, desizaun ikus Timor-Leste sosa asaun ho porsentu 30% hodi bele iha diretu ko’alia kona-ba esplorasaun Greater Sunrise nian.

Bazeia ba komunikadu konjuntu ne’ebé diáriu ne’e asesu, Primeiru Ministru, Taur Matan Ruak, felisita prosesu ne’e tanba sei fó dalan ba Timor-Leste atu kontinua diskusaun ho membru joint Ventura seluk Greater Sunrise.

Nune’e, Reprezentante Espesiál Timor-Leste, Kay Rala Xanana Gusmão hateten, ConocoPhillips ho Joint Ventura seluk sempre koñese preferénsia Timor-Leste atu dezenvolve Greater Sunrise liu husi kadoras mina ba Beasu Tasi Mane. Ne’e duni, hein katak bele koordena ho joint Ventura seluk hodi dezenvolve projetu ho susesu.

Parseiru atuál ba joint Ventura Sunrise mak hanesan Woodside hanesan operadora ho partisipasaun porsentu 33,4%, ConocoPhillips porsentu 30%, Shell porsentu 26.6%, no Osaka Gás porsentu 10%.

Kampu Gás nian no kondensadu Sunrise no Troubador ne’ebé baibain koñesidu Kampu Greater Sunrise, lokaliza besik kilómetru 150km iha sudeste Timor Leste nian no kilómetru 450km iha Norte Darwin Territóriu Norte nian.

Prezidente ConocoPhillips Austrália Osidente, Crish Wilson hatete, desizaun atu fa’an partisipasaun ne’e mosu hafoin abordajem ida husi Governu Timor-Leste.

“Folin fa’an ne’ebé negoseia mak besik millaun $350, liuliu rekupera fali kustu ne’ebé ConocoPhillips hasai ona ligasaun ho Greater Sunrise nian”, dehan nia.

Tranzasaun kona-ba fa’an kobre partisipasaun husi ConocoPhillips iha kontratu partilla produsaun 03-19 no 03-20iha arendamentu sira retensaun nian NT/RL2 no NT/RL4. Tranzasaun ne’e sei remata trimestre dahuluk 2019.

PR Lú Olo Seidauk Simu Informasaun

Governu Timor-Leste halo akordu ho ConocoPhillips hodi sosa asaun 30%, nu’udar maneira ida atu dada kadoras mai TL, maibé Prezidente Repúblika (PR), Francisco Guterres ‘Lú Olo’ hateten nia rasik seidauk simu informasaun ruma husi governu atu bele ko’alia.

“Ha’u seidauk seidauk simu informasaun ruma husi governu”, dehan nia, iha Salaun Ministériu Finansas, Ai-Tarak Laran, horisehik.

PR Lú Olo dehan, Xanana Gusmão halo akordu ho ConocoPhillips nian 30% atu dada kadoras mai TL ne’e fiar ka lae Prezidente Repúblika labele hateten tanba hatene uluk informasaun maka bele hateten ida ne’e.

Rate this item
(0 votes)

Independente Digital TV

Tuir ami iha Twitter

Kalendariu Notisia

« July 2024 »
Mon Tue Wed Thu Fri Sat Sun
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31