Nia hatete, iha Portugál sai kazu boot ida, joven lubuk ida tanba sira sai vitima ema bosok sira, to'o iha Portugál klaru servisu laiha, posibilidade atu ba Inglatera hanesan maiória hakarak la konsege tanba pasaporte portugeza.

“Prezidente Portugál rasik tun ba haree sira dala rua ona. Primeira-vés Prezidente Marcelo Rebeiro de Sousa ba haree no foin daudaun ami ba haree. Grupu ida ne'ebé hela tiha fatin ida ne'ebé pertense ba polísia sira nian no ko'alia ho joven balun maiória sira hakarak ba Inglatera no Irlanda," dehan PR Horta, iha Aeroportu Internasionál Nicolau Lobato, Komoro, Domingu (6/11).

Nia esplika, Governu Timor-Leste ho Governu Portugál atu halo akordu sei buka haree ida ne'e.

"Ha'u-nia mensajen mak se mak hakarak buka oportunidade ba servisu iha li'ur ida-idak nia direitu, rai ida ne'e livre, demokrátiku atu hetan pasaporte hetan osan uituan selu pasaporte ne'e de'it, selu billete," hatete Xefe Estadu.

Xefe Estadu esplika, programa Koreia ho Austrália nian ofisiál protesaun kompletu. Sé mak hakarak ba Europa hatene ona labele liuhusi ajensia sira ne’ebé la koñese.

"Ha'u-nia apelu dala ida tan joven sira hela hakmatek prosesu atu hetan nasionalidade Portugés, sira sei buka oinsá aselera prosesu sira ne'e, maibé tuir regras Uniaun Europeia tomak, la'ós Portugál de'it," haktuir nia.

Ne'eduni, PNTL nia servisu mak buka elementu sira ne'e mak responsavel ba situasaun ne'e.

Nia hatutan, problema ne'e iha grupu kiik oan ida mak lakohi ba fatin sira governu hetan tiha ona iha Portugál, tanba sira rasik hatete bainhira sira sai husi fatin refere, sira la liga fatin ne'e normál, la'ós sira toba arbiru, ema lori manta ho sasán lubuk ida ba sira.

Purtantu, malirin mai daudaun ona hatete ba joven sira lalika tauk ba fatin sira ne'ebé Governu oferese ona atu sira hela, toba iha fatin sira ne'ebé kualidade ka ba servisu daudaun ona pasaporte sei hetan, tanba ne'e direitu sidadaun Timor nian.

Molok ne'e, Sekretáriu Jerál Partidu FRETILIN, Marí Alkatiri, hato'o proposta ba Prezidente Repúblika, José Ramos Horta, atu buka solusaun ba timoroan iha Portugál tanba osan ne'e rai malirin ona.

Nia hatete, preokupasaun ba timoroan sira no sidadaun sira ne'ebé kontinua ba de'it, ba Portugál ne'e boot tebes, entaun  mai atu hamutuk ho Prezidente Repúblika atu fó opiniaun fó solusaun ne'e mak husu molok nia atu ba Portugál.

"Ohin ami ko'alia,  ha'u fó ha'u nia proposta, ba Prezidente, atu  lori proposta ne'e ba Portugál para ajuda fó solusaun, solusaun ida ke temporariu mas tenke iha solusaun para depois atu hahú prosesu ida ke para atu bele solusaun ida permanente mas tenke iha solusaun bá ida, tanba sira  ba toba iha jardim ne'e agora rai komesa malirin  ona ne'e  susar tebes ne'e mak ha'u nia preokupasaun boot agora," dehan Alkatiri.

Nia haktuir, proposta ne'e Prezidente atu lori ba Portugál,  para atu kria kondisoes para sira  bele aprende buat ruma iha Portugál, hahú ho língua Portugeza,  se sira  serbisu nia balu ke sira hakarak halo iha ne'ebá, sira tenke iha oportunidade ida  atu hetan treinu.

Entretantu Sekretáriu Jerál Partidu FRETILIN Marí Bim Amude Alkatiri afirma,  sidadaun Timoroan sira kontinua bá tan ne'e presija halo akordu hanesan mós kooperasaun entre Timor no Korea

"Agora sira ida atu ba tan, ne'e  ita halo dadauk ba Korea fó uluk treinu iha ne'e  treinu língua profisional, depois hotu-hotu iha direitu ba ne'ebé de'it, labele ba ema nia rai atu sai fali refujiadus, ba para atu kontribui lori sira nia kbiit, sira nia kapasidade para atu hatudu katak, ita mós iha talentu, sé mak hakarak hala'o múzika bele halo,"dehan Marí.

Nia hatutan, koperasaun entre Timor Portugál la'o kleur, tuir nia hanoin la’os lobi polítika ho Portugál, maibé sira bá Portugál, governu mós  hatene, maibé nu'udar líder nasionál ida preokupa maka tebes ho joven sira ne'e buka ko'alia ho autoridade Portugál sira liu-liu Prezidente Repúblika Portugál.