Tuir komunikadu ne’ebé Online INDEPENDENTE asesu, relata, Prezidente Repúblika, José Ramos-Horta defende nesesidade atu iha konetividade aerea entre Timor-Leste no Kambódia, hodi fasilita mobilidade sidadaun.

“Akordu ne’e, bolu air service agreement (akoordu servisu aereo) ne’e hanesan akordu umbrella (sombriña), signifika akordu jerál, para bele dezenvolve konetividade aerea, para ita bele iha voo normal entre Kambódia no mai Timor no Timor bá Kambodia” informa Xefe Estadu hafoin sai sasin ba assinatura akordu entre Ministra Negosiu Estranjeiru no Kooperasaun Adalgiza Magno ho Reiñu Kambodia, sesta (21/10).

Tuir Xefe Estadu, akordu servisu aereo ne’e la signifika halo lalais kontetividade, tamba presija halo investimentu husi empreza Kambodia balun.

“Sira bele halo, sira sei estuda, bele ka lae, iha sustentabilidade ka lae, iha passajeiru ka lae, maibé kompaña aerea iha mundu, sira nia governu subsidia maka’as, tanba negósiu aereo, kompaña aerea, la’os fásil” arfirma Xefe Estadu.

Xefe Estadu hateten, estadu Timor-Leste no Reiñu Kambodia, presija tau investimentu, hodi dada interesse husi empreza aerea ruma, atu halo operasaun mensal, tanba empreza bo’ot hanesan Fly Emirates no Qatar Airway mós hetan apoiu maka’as husi sira nia governu.

Projektu ne’e sei sai alterativu bá viajen entre Dili ba Phonom Pen no mos ba kontinente Europa no bá Xina, ho folin tikete baratu.

“se buat sira ne’e estuda halo didi’ak, halo promosaun di’ak, passajeiru sira husi Xina, sira mai Phonon Penn, tanba aviaun husi Xina mai Kambódia ne’e, atus ida kada loron, aviaun oi-oin, balun karga aerea, balun turista. Entaun, passajeiru husi Xina hakarak bá Timor, uluk liu husi Singapura, liu husi Bali sempre problema, bele karik mai Phonon Penn bá Timor” konklui Xefe Estadu.

Prezidente Republika hateten, nia halo konsulta ho entidade barak no presija investimentu maka’as, hodi fó estímulu ba iha seitor seluk.