Diretór Ezekutivu Fundasaun Mahein, Abel Amaral hateten, Fundasaun Mahein konsidera kazu José Bernardo nia mate iha sela no kazu Padre Abito nia ne’e seriu tebes, ne’e duni presiza aselera ninia prosesu investigasaun.
" Kazu rua ne’e sériu nune'e ita husu ba entidades polisial ne'ebé mak halo investigasaun ba kazu refere tenke aselera ninia prosesu investigasaun, nune’e bele fo serteza (kepastian) ba familia," informa Abel Amaral iha Parlamentu Nasionál, (20/10).
Nia kestiona katak, to’o agora familia husi matebian Amu Abito ho José Bernardo sei iha situasaun inserteza nia laran, tanba prosesu investigasaun ba kazu hirak ne’e to'o agora seidauk iha rejultadu.
Antes ne’e, Ministériu Públiku (MP) liu husi Prokuradór Titulár, Jacinto Babo delega ona kompeténsia ba Polísia Siéntifiku Investigasaun Kriminál (PSIK) hodi loke investigasaun ba kazu asidente tráfegu ne’ebé hamate Padre Abito José Brites Casimeiro, iha área Dare, Postu Administrativu Nain-Feto, Munisipiu Dili iha loron 22 Augostu 2022.
Aliened ne’e, Ministériu Públiku (MP) mos fó ona delega kompeténsia ba PSIK hodi kontinua loke investigasaun ba kazu matebia José Bernardo ne’ebé deskonfia mate tara an iha sela detensaun Komandu PNTL, Munisípiu Dili.
Iha biban ne’e, Fundasaun Mahein husu ba lider partidu polítikus no membru Governu labele halo intervensaun politika ba servisu polisia nian.
