Presidente AJTL, Zeovania Viera hateten, AJTL durante ne'e halo advokasia hodi promove no hametin liberdade imprensa no liberdade espresaun haree katak, karta notifikasaun PNTL liu husi SIKN ne'ebe dirije ba Xefe Redasaun Jornal Independente, no Jornalista nu'udar tentativa no ameasa ida ba independensia jornalizmu no liberdade imprensa iha Timor-Leste hanesan haktuir iha Konstituisaun RDTL, Artigu 40 no 41.
Nia dehan, PNTL nia karta notifikasaun ba Redasaun Jornal INDEPENDENTE, relasiona ho notisia edisaun 12 Outubru 2022 ho titulu “Ejizensia Demite Gastao, Komisariu Mateus: PNTL Simu Karta husi Vise MJ no Vise MOP no notisia ho titulu “Deskonfia Vise MJ Haruka Karta ba Komando PNTL atu Demite Gastão, nu'udar aktu represivu ne'ebé rejime ditadura hanesan Orde Baru uza iha tempu okupasaun Indonezia hodi hanehan jonalista no mídia atu la bele fo sai lia-loos.
Tuir nia, Komandu Jeral PNTL nia aktu hodi notifika Xefe Redasaun Jornal Independente, no Jornalista uza Kodigu Prosesu Pensi la'ós aktu demokratiku, tanba notisia sira ne'ebé Jornal INDEPENDENTE publika ne'e produtu jornalistiku ne'ebe bazeia faktu, la'ós aktu krime.
Publikasaun ne'e mós nu'udar parte ida husi papel mídia kontrolu sosial nian hodi hakunu sidadaun sira nia direitu atu asesu ba informasaun loloos no kredivet kona-ba servisu publiku hotu-hotu. Karta notifikasaun ne'e hakanek ona liberdade Imprensa no valor Demokrasia iha Timor-Leste iha tempu ne'ebe Timor-Leste prepara-an atu tama iha ASEAN.
Tan ne'e, AJTL harak hato'o nia pozisaun hanesan tuir hanesan, AJTL kontra no kondena notifikasun husi Komandu Jersl PNTL ne'ebe dirije ba Xefe Redasaun Jornal Independente, Jorgino dos Santos no Jornalista Domingos Gomes, tanba sei hatauk jornalista no midia atu halo auto-sensura iha kontestu kobertura no publikasaun notisia sira iha futuru.
Aliende, AJTL konsidera karta notifikasaun ida-ne'e hatudu katak Komandu Jeral PNTL la afavor ba laloos kona-ba intervensaun politika ba instituisaun seluk nia servisu ne'ebe kansela midia sira publika, maibé hakruk-liu presaun politika husi governante no politiku sira.
"AJTL mos sei halo karta ba Prezidente Republika, Jose Ramos Horta nu'udar mos laureadu Nobel da Paz no Primeru Ministru Taur Matan Ruak kona-ba Komandu PNTL nia karta notifikasaun, tanba ameasa dadauk liberdade imprensa no liberdade espresaun iha ambitu Timor-Leste halo preparasaun atu tama iha ASEAN iha tinan oin", dehan nia liu husi Konferensia Imprensa, iha sede AJTL, Fatuhada, segunda (24/10).
Nia hatutan, ho posisaun ne'e, bainhira husi Komando PNTL la dada hikas Karta notifikasaun ne'e, AJTL kontinua hato'o karta ba xefe estadu no xefe governu ba karta notifikasaun ne'e, hodi PNTL respeita servisu jornalista no liberdade imprensa.
Ho nune’e, AJTL husu Komandu Jeral PNTL atu hapara notifikasaun ne'ebe haruka ba Redasaun Jornal INDEPENDENTE no husu atu uza Lei Komunikasaun Sosial atu rezolve kazu sira ne'ebe iha ligasaun ho produtu Jornalistiku, la'6s uza fali Kodigu Penal hodi kondena jornalista no midia tamba notisia la'Gs aktu krime.
"Husu ba Conselho de Imprensa atu foti Inisiativa hodi halo mediasaun ba kazu desputa entre PNTL no Jornal INDEPENDENTE ne'ebé nia kauza mak publikasaun notisia atu rezulta ba iha win-win soluition," nia hato'o.
Prezidente AJTL mós apela ba jornalista sira no kanal midia hotu-hotu iha rai-laran atu fo solidariade ba malu hodi kontinua publika kazu ne'e to'o hetan solusaun loloos no justu.
Tan ne’e, Jornalista no Kanal mídia hotu atu nafatin kumpri Kodigu Etika Jornaistika, Lei Komunikasaun Sosial no prinsipiu sira jornalizmu nian bainhira hala'o knaar jornalizmu iha ne'ebé de'it atu nafatin asegura no garante liberdade imprensa no liberdade espresaun iha Timor-Leste.
Entretantu, Diretór Jornal INDEPENDENTE, José Sarito Amaral, hatete, nia parte simu ona karta Notifikasaun ne'e iha loron (21/10) ba xefe redasaun no Jornalista, husu atu iha loron segunda ohin (24/10) Presta deklarasaun ba Publikasaun notisia ho titulo rua.
"Tan ne'e, ohin ha'u rasik desidi, xefe redasaun no Jornalista la presta deklarasaun iha SIKN ho razaun karta Notifikasaun ne'e, sala kamar tan deit Publikasaun notisia rua ne'e", nia dehan.
Nia haktuir, ho publikasaun rua ne'e, atu dehan katak, Jornalista no Xefe Redasaun la'os kriminozu Ida, tanba ami so hakerek informasaun bazeia ba faktus no verasidade.
"Saida mak faktus no verasidade, faktus maka Komisariu Mateus konfesa duni Karta husi Vise nain tolu ba ninia Komando Jeral nia fatin, no segundo mak faktus ida hatudu katak, vise Ministru Justisa nia konteudu karta ne'e husu atau demite duni Gastão," nia dehan.
Tanba ne'e, husu PNTL atu labele kriminaliza produto jornalistu ninian, tanba jornalista la'os kriminozu, tuir lei komunikasaun sosial hateten momos ona katak, fo espasu ba sidadaun hotu, karik iha Publikasaun notisia sente sai vitima bele foti resposta no retifikasaun.
