Ministru Transporte no Komunikasaun, Miguel Marques Manetelu hatete, iha tinan kotuk Diresaun Nasionál Transporte Terreste (DNTT) fó ona karta ba taxi antigu sira katak iha tinan ne’e sira labele halo ona operasaun.
“Signifika agora iha 2025 ona ne'e surat ne'e nia mandatu ne'e termina ona. Signifika taxi lubuk ida ne'ebé mak tuan, lubuk ida ne'e agora labele ba halo inspesaun. Kuandu ba halo inspesaun prende ona, tanba karreta barak laiha kondisaun," dehan Manetelu hafoin partisipa distribuisaun sertifikadu ba partisipante futuru líder ASEAN nian, iha salaun MNEK Pantai Kelapa, Tersa (04/02).
Ministru ne’e afirma, tuir dadus ne’ebé iha kuaze taxi 100 resin mak labele halo ona operasaun.
“Kuandu ita foti asaun, ema sempre liga ba sira-nia etu bikan ida mak ne’ebá no moris mak ne’ebá, ne'ebé ita foti sasán ho kuidadu. Tan ne'e mak hanesan ohin ha'u hatete la'os barak mais karreta besik 100 hanesan ne'e labele halo operasaun ona," nia dehan.
