Xefe Suku Kulu-hun Deus Dado Martins hatete, relasiona ho eviksaun ba alargamentu suku Kulu-hun nian, total uma hamutuk 31 no komunidade afeitadu sira dadaun ne'e, ida-idak lori nia dokumentu ba hatama iha Ministériu Obras Públika (MOP).
"Agora ida-idak lori sira nia eleitoral, BI no konta bankaria ba iha Obras Públika ida iha Mandarin," dehan Xefe Suku ba Jornalista INDEPENDENTE iha nia knar fatin Kulu-hun, Kuarta (05/02).
Autoridade lokal hatutan, Tan ne'e komunidade sira dadaun ne'e hein deit tanba momentu iha iha loron sia (9) fulan Janeiru 2025 ekipa konjunta ne’ebé lidera husi Sekretáriu Estadu Asuntu Toponimia no Organizasaun Urbana halo sosializasaun ba komunidade sira, nune’e iha loron sia (9) fulan Fevereiru ekipa tun hodi hamos ona fatin refere.
Tan ne'e iha loron sanolu (10) fulan Janeiru komunidade balun ho voluntariumente hahú sobu rasik sira nia hela fatin ho razaun katak sira sobu rasik atu nune'e sasan balun sira sei bele uza, estadu mak sobu estraga de'it sasan sira.
Xefe Suku esplika, husi dadus ne’ebé iha maioria husi loja, keos, restaurante inkliu apotik balun, nune’e mós iha komunidade uma-kain 20 hela iha rai estadu no iha 11 mak hela iha rai privadu.
Iha Sorin seluk, Xefe suku Bekora Interinu, Luis do Carmo Soares hatete, iha semana ida liu ba ekipa husi Ministériu Obras Públika (MOP), Terras no Propriedade hodi halo ona levantamentu dadus iha suku Bekora kona-bá komunidade sira ne'ebé afetadu ba alargamentu estrada.
"Dadus provizoriu ba alargamentu estrada hamutuk uma 170 ne'ebé kompostu husi loja, keos, rental, inklui mos sira ne'ebé loke restaurante ne'ebé hola parte iha suku Bekora," katak Xefe Suku Interinu.