Prezidente INSS, Arlindo Pinto, hatete, pagamentu ne’ebé refere ba da-haat nia ne'ebé la konsege hala’o iha tinan kotuk.
“Pensaun sosiál ba ita-nia inan-aman ferik katuas sira ba pagamentu faze dahaat nian ba tinan 2024 nian, ita lakonsege selu, ne’e ita halo pagamentu fali iha tinan ne’e iha loron 20 Janeiru. Portantu ita halo jestaun ida-ne'e hosi loron 20 Janeiru to’o iha 20 fevereiru tinan ne’e. Ita hahú ho munisípiu hitu, falta munisípiu neen mak seidauk”, dehan Prezidente INSS, Arlindo Pinto, iha nia knaar fatin, Kaikoli, Segunda (3/01).
Nia dehan, munisípiu neen ne’ebé seidauk mak Baucau, Bobonaro, Covalima, Ermera, Lautém, no Liquiça sorin.
“Munisípiu neen seidauk ho razaun tanba iha pagamentu ne’e, ne’ebé kada tinan halo pagamentu dala ida (serentak) iha trimestre ida, mais depois haree ita halo jestaun ba orsamentu no iha orsamentu balun ne’ebé integra iha orsamentu 2025 nian, hosi munisípiu neen nia orsamentu tama iha tinan 2025 nian, ne’e sei selu hamutuk iha periodu trimestre nian tinan 2025 nian. Entaun hosi munisípiu neen ne’ebé seidauk simu ne’e iha momentu ne’ebá sei simu retroativu iha fulan-Marsu”, nia dehan.
Nia dehan Fulan-Marsu hahú halo pagamentu normál ba orsamentu 2025 nian ho nia benefisiáriu rihun 120.
“Totál orsamentu anuál ba 2025 miiliaun $111, ne’ebé ita sei selu ba ita-nia fetik-katuas sira rihun 120. Hosi núemeru ne’e tama ba planu 2025 nian. kada tinan halo pagamentu ne’e nia kuantidade ema sempre tun-sae, tanba balu mate, balun fali nia konta laloos entaun adia fali ba pagamentu tuir mai”, nia esplika.
Mekanizmu pagamentu ne’e INSS hamutuk ho Banku Nasionál Sentrál Timor-Leste (BNCTL) halo pagamentu direita ba ATM no cash iha kada sentru suku. BNCTL mós kria ajénsia banku nian iha suku maibé akumula hotu iha suku sira hotu. Sira monta sira-nia ajénsia hamutuk 20 ou 30-resin iha suku territóriu munisípiu sira.
Portantu iha tinan 2024 ne’e INSS rejistu foun 5.000-resin, tinan ne’e seidauk iha relatóriu, bainhira periodu ida-ne’e hotu tiha lai foin hatene.
Antes ne’e iha inísiu tinan 2024 INSS halo pagamentu pensaun sosiál ne’ebé mak sei fahe ba kategória tolu ho nia valór pagamentu sei la hanesan bazeia ba kategoria idade, enkuantu idade 60-70 ho valór orsamentu $60, idade 70-80 ho valór $80 no idade 80 ba leten ho valór $100.
