Xefe Suku Komoro, Eligio José Marcal hatete, foin dadauk ekipa konjunta ne'ebé mak lídera husi Sekretáriu Estadu Asunto Toponomía no Organizasaun Urbana ho Ministériu Obras Públiku halo ona levantamentu ba uma-kain 146 iha aldeia Moris Foun no tau ona númeru.
Enkuantu uma ne’ebé seidauk tau númeru, nia dehan, kuaze iha uma 10 resin. Nune’e total uma ne’ebé sei hetan eviksaun kauze 150 resin.
"Agora uma 146 mak tau ona (númeru), sira seidauk tau ne'e kauze uma-kain 10 resin de'it mak seida tau to'o agora, ne'ebé totál hamutuk mak uma 150 resin," nia dehan.
Iha 30 Janeiru ne’e, Xefe Suku informa, SEATOU halo ona enkontru ho komunidade sira husi aldeia Moris Foun hodi prepara an sai husi fatin ne’ebé sira okupa.
"Ida ne'e foin mak primeiru enkontru, ne'ebé mak SEATOU hatete enkontru atu fó hatene ba komunidade sira halo preparasaun tanba ne'e área risku. SEATOU sei fó notifikasaun iha parte balun hanesan espasu públiku, brongjon leten no trotoar ka besik mota," nia dehan.
Tanba ne'e, nia dehan, SEATOU husu atu komunidade atu fó espasu metru 10 atu loke estrada. Nune’e, uma sira ne'ebé mak halo iha brongjon leten tenke sai.
"Aban-bainrua sei muda ho distánsia metru 10, entaun hakarak ka lakohi, komunidade sira tenke koopera, ne'e tanba orietasaun husi leten, ami hanesan autoridade ami pasa informasaun ba sira, liu husi enkontru ida hanesan no mós liu husi xefe aldeia par atu sira bele rona kedas, aban-bainrua obras atu tuun mai sukat entaun sira hatene ona," dehan nia.
Nia esplika iha enkontru ne'e, komunidade sira sujere atu molok semana ida ka fulan ida hasai notifikasaun atu sira prepara aan.
Molok ne’e, Sekretáriu Estadu Asuntu Toponomía no Organizasaun Urbana, Germano Santa Brites informa, daudaun ne'e ekipa konjunta fó ona avizu ba komunidade sira ne'ebé mak hela iha mota sorin parte Fomentu II, Bebonuk to'o Ponte Kasnafa atu prepara an hodi muda sai.
"Agora ita fó avizu fali husi mota sorin tan husi parte Bebonuk, ba Fometu II nia sorin to'o Ponte kasnafa, sira ne'ebé mak hela iha mota ninin halo favór muda sees, husi brongjon nia leten, bareira mota nian, par evita mota tuun, mota sobu hanesan hodi bainhira iha dia 1 ho 2 (Janeiru 2025) kalan, ne'ebé mak mota sobu," dehan Germano, iha palasiu governu, Sesta (24/01).
