Prezidente Institutu Nasionál Seguransa Sosial (INSS), Arlindo Pinto dehan, daudauk ne’e nia parte planeia hela oinsa atu halo pagamentu dijital.

“Agora ita planu hela atu ba pagamentu dijitalizasaun, maibé la'ós tinan ida ne'e maibé tinan ida-rua mai tan, agora ita halo koordenasaun servisu hamutuk ho entidade banku sira, banku komérsial sira hanesan BRI, BNCTL, atu nune'e fasilita pagamentu kona-ba dijitalizasaun,” dehan Arlindo, iha nia knar fatin, Kaikoli, Segunda (03/02).

Tanba, nia dehan, liu husi pagamentu dijitalizasaun ne’e ajuda tebes benefisiáriu sira.

“Mekanismu pagamentu mak kuandu sistema ne'e kria hotu ona ita sei kordena ho banku par benefisiáriu sira-nia orsamentu ne'e tau hotu iha kartaun pagamentu ninian, atu nune'e banku komersiál sira sei monta hela sira-nia ajénsia iha kada nível suku ho keos sira ne'ebé sira identifika sira-nia ajensia depois benefisiariu kada fulan bele foti sira-nia osan iha ajensia sira ne'ebé banku sira iha,” nia dehan.

Nia hatutan, objetivu husi programa pagamentu dijitál mak atu lori serbisu finanseiru bazika, liu-liu pagamentu dijitál no pontu asesu finanseira bázika ba komunidade sira ne'ebé iha área rurál hodi fasilita sira atu koñese saida mak pagamentu dijitál no fasilita sira asesu uluk iha pagamentu iha pontu finanseiru sira neʼebé besik.