Tuir Diretór Jerál SNAEM, Simplicio Amaral hatete, tuir planu estratéjiku tinan 2023-2027, kada tinan tenke sosa ambulánsia 5 hodi distribui ba iha fasilidade saúde hotu.

"Ambulánsia 5 ne'ebé atu sosa ne'e primeiru ita sei  atende lai ba Amu Papa atu mai vizita ne'e, depois Amu Papa fila-fali ba Vatikanu, ita sei destribui ba iha Munisipiu Likisa, Vikeke, Ermera, Kovalima no Dili," dehan nia iha salaun CNE, Segunda (27/05).

Kona-ba sosa ambulánsia 5 ne'e, nia dehan, tuir esperiénsia ne'ebé Ministériu Saúde (MS), no SNAEM sosa sempre iha Nasaun Tailádia,  no husi ambulánsia 5 ne'e Ministériu Saúde  aloka orsamentu tinan 2024 nian ba SNAEM  $320 mil.

Nia haktuir dadaun ne’e, totál Ambulánsia iha SNAEM hamutuk 50 husi númeru ne'e 28 mak aat no 24 mak sei kobre iha munisipiu sira, maibé iha munisípiu balun ambulánsia ida (1), tanba ne'e la sufisiente hodi evakua pasiente sira ba mai iha fasilidade saúde sira.

"Ita iha Ambulansia 50 mak durante ne'e kobre iha territoriu nasional, maibé husi Ambulansia hirak ne'e agora dadaun ita iha deit Ambulansia 24 mak sei Diak no 28 mak la Diak ona, tanba ne'e Ambulansia sira ne'ebe kondisaun la Diak ona ne'e ita sei hatama ba iha Patrimoniu Estadu," nia esplika

Husi ambulánsia 28 ne'ebe aat ne'e, nia dehan, agora dadaun SNAEM alista ona no tempu badak sei entrega ba iha Patrimóniu Estadu, tanba ambulánsia sira ne'e labele hadi'a ona.

Entretantu, pasiente sira husi Ataúru ne'ebé atu mai halo atendementu iha HNGV, defende ba pasiente bainhira pasiente la grave tula deit ho ambulánsia marítima, tanba tula iha ambulánsia aero ne'e karun uitoan.

Nune'e, Em jeral iha teritóriu laran tomak Janeiru to'o Abríl evakua ona pasiente hamutuk 5,060 pasiente, tuir dadus ne'ebe SNAEM evakua mai iha Munisípiu Dili, Hospital Rejionál ne'e maioria inan isin rua, husi Atauru de’it evakua pasiente hamutuk 25.

Husi pasiente 5,060 ne'e maioria mai husi Munisípiu Baucau, Aileu, Ermera no Hospitál Referál Maubisse, dadus sira ne'e maioria inan isin rua sira ne'ebe ho kondisaun komplikadu, atu nune'e Sira presiza halo tratamentu iha HNGV.