Diretór Ensinu Báziku Central Clacuc, Antonio Bersior Sarmento hato’o asuntu ne’e, ba jornalista sira iha nia knaar fatin Caicassa, Postu Administrativu Fatu-Berliu, Munisipiu Manufahi, katak implementasaun merenda eskolar importante tebes ba nutrisaun nian, no ema hotu hatene katak iha Timor-Leste má-nutrisaun sa’e maka’as.
Tanba ho situasaun ne’e, nia parte husu ba governu liliu Ministeriu Edukasaun (ME) no Ministériu Administrasaun Estatál (MAE) atu halo kontrolu no tau atensaun ba fornesedór merenda eskolár nian.
Kona-ba menu ne’ebé MOKATIL fahe ba kada eskola sira atu la’o tuir nia regulamentu katak nia regra hanesan Tahu-tempe no na’an manu sira ne’ebé oferese, ema hotu nia hakarak mak tenki ho kualidade ne’ebé di’ak, nune’e mós iha divizaun ba hahán hanesan na’an manu ida alunu hirak atu han no tahu-tempe ida alunu hirak mak atu han.
“dala ida tan atu rekomenda ba governu husu katak kontrola tebes ba parte merenda eskolar atu nune’e fó nia vantajem ba ita nia oan sira ne’ebé mak iha eskola, liliu ba parte nutrisaun,” dehan Diretór iha nia knar fatin Clacuc, Segunda (27/05).
Iha sorin seluk, koziñeira husi eskola Pre-Primaria Caicassa, Victoria Amaral hateten, foos ne’ebé nia parte te’in ba estudante sira durante loron haat iha semana dahuluk kondisaun di’ak hotu. Maibé atu tama ba loron dalima nian mak sira hetan fós ne’e ho kondisaun aat no ular.
“Iha segunda ne’e ami foin hahú tein, tanba sira feriadu tiha semana ida, entaun sira tama mai mak ami foin tein to’o iha Kinta, entau iha Kinta ne’e ami hasai tan foto mak hetan fali ular, no iha memento husi Clacul lori mai mós udan, nune’e mantolun ne’ebá sira hasai mai mós iis kedas,” Kuzineira esplika.
Relasiona ho foos aat no iis ne’e, iha segunda, loron 27 fulan maiu tinan ne’e, ekipa MOKATIL ho nia estrutura to’o kedas iha fatin akontesimentu hodi observa direita foos ne’ebé aat.
Prezidente MOKATIL, Helio Dias da Silva hatete, ho problema refere nia parte, rona ona informasaun husi direjente no ekipa jestor merenda eskolár husi Munisípiu Manufahi nian katak, bainhira tula foos ba iha Clacuc ho kondisaun udan.
MOKATIL hanesan organizasaun kamponezes ne’ebé responsabiliza ba produtu sira hanesan karbohidrat no vitamina ba estudante sira liu husi programa merenda eskolar nian, lori MOKATIL nia naran hato’o deskulpa ba problema sira ne’ebé akontese durante implementasaun merenda eskolar iha EBC Clacuc ho EBF Caicasa.
“Hanesan prezidente MOKATIL nasionál ha’u husu deskulpa barak tebes tanba durante ne’e iha problema oituan-oituan ba merenda eskolár, tanba movimentu kamponezes Timor-Leste ita jia responsabilidade ba produtu hotu-hotu liliu ba karbohidrat ho vitamina bai ta nia oan no alin sira,” dehan Prezidente.
Preidente MOKATIL afirma, programa merenda eskola la’o ona durante semana tolu ona, bazeia ba akordu ne’ebé durante MOKATIL halo ho Ekipa Jestór Programa Merenda Eskolar ho Governu lokál katak MOKATIL sei distribui produtu sira ne’e.
Iha akordu ne’e, nia hatete, MOKATIL sei konsentra produtu hirak ne’e iha armajen edukasaun Munisipiu nia hafoin kontinua distribui ba eskola sira, signifika MOKATIL nia responsabilidade to’o iha EBC de’it.
“Kuandu to’o ona eskola Sentrál sira ita-nia ekipa jestór merenda eskolár sira foin mak sira distribui na filiál sira ne’e responsabildade iha eskola sentrál sira ninia ekipa jestór sira klaru katak ne’e mobilizasaun ida ne’ebé boot servisu ne’ebé sempre iha fallansu no ita mós komprende klima no situasaun ida agora tanba bele prezudika mós iha prosesu distribuisaun,” nia esplika.
Nia akresenta, eskola sira seluk iha Munisípiu Manufahi programa merenda eskolár la’o di’ak, maibé iha EBC Clacuc no EBF Caicasa mak kondisaun fós aat.
Entretantu, produtu ne’ebé MOKATIL oferese ba merenda eskolar iha Munisipiu Manufahi hanesan, fós, mantolun, koto, tempe, tahu no manu Broiler