Reitor UNTL, João Pereira hateten, iha komplikasaun barak liuliu iha situasaun infraestrutura iha UNTL, hanesan sala aula, maibé sira tenta hodi bele akumula estudante sira.
"Ami nia proposta ne'ebe mai husi fakuldade sira hamutuk 3.720, entaun ami aumenta 499, ho Ida ne'e numeru ne'ebe boot uitoan, maibe ita kompara ho tinan kotuk ami propoin 3.000 maibe kuandu governu haruka ba 6.000, entaun tinan ne'e iha redusaun uitoan, nia aumentu besik 800," dehan nia, iha salaun FDCH, foin lalais ne'e.
Ho ida ne'e, UNTL espera katak estudante 4.421 ne'e rejista 100% iha UNTL, maibé normalmente iha balun mak la rejista, maibe ne'e sira nafatin iha esperansa tanba oportunidade di'ak ba jovem sira hodi estuda iha universidade publiku iha Timor-Leste.
Entretantu, Governu liuhusi Ministeriu Ensinu Superior Siensia no Kultura (MESSK) liuhusi Komisaun Asesu Engeresu Ensinu Superior anunsia ona rezultadu lista final husi kandidatu ne'ebe admetidu no asesu UNTL no Institutu Politekniku Betano (IPB) hamutuk 4.804.
Molok ne'e, Prezidente Komisaun Asesu Engeresu Ensinu Superior Maria Filomena Guterres Lay hatete, total kandidatu 4.804 ne'ebe pasa ona ba Instituisaun Ensinu Superior Publiku rua ne'e kompostu husi UNTL 4.421 no IPB hamutuk 383.
“Husi numeru 4,804 ne'e kategoria feto 3.033 no mane 1.771 kompostu husi UNTL nian feto 2.817 ne'ebe ekivalente 64 no mane na'in1.604 ekivalente 364, no IPB feto 21 ekivalente 564 no mane 167 ekivalente 444, ho nune'e numeru kandidatu ne'ebe admetidu ona ba UNTL no IPB kategoria husi rejime jeral no rejime espesial, no husi rejime jeral nian Ministeriu kontinua fo oportunidade ba estudante finalista sira husi ensinu sekundariu tinan akademiku 2022 no ba rejime espesial loke oportunidade ba kandidatu sira ne'ebe mak iha situasaun esensional," dehan nia iha salaun FDCH, sesta (24/02).
