Diretora Ezekutiva FOKUPERS, Maria Fatima Pereira Guterres hateten, iha implementasaun lei kontra violensia domestika durante tinan 12, husi organizasaun ne'ebé servisu direita lei iha lakuna barak presiza hadia, tanba seidauk iha artigu ida iha kodigu penal hodi bele kondena autor ba kazu insestu.
Nia dehan, ekipa ida ne'ebé lidera husi SEII hamutuk ho FOKUPERS, Alfela, JSMP nomós Rede Feto, Fundasaun Alola ne'e servisu hodi bele hare ba revizaun lei ba kazu insestu nian.
"Entaun dadaun ne'e, ita halo hela esforsu ida hodi konsege esplora ona dadus sira hotu atu bele konvense Governu liu husi Ministeriu relevante sira hodi bele halo revizaun lei ida ne'e, tanba se lei ne'e halo revizaun ne'ebé hodi kria artigu ida iha kodigu penal, tanba lei LKVD ninia pena sira eziste iha KP hodi bele kondena autor ba krime insestu", dehan Maria Fatima, iha servisu fatin, Farol, (27/02).
Nia dehan, progresu diskusaun ba revizaun lei kazu insestu ne'e rasik, iha momentu ida ne'e, husi parte ekipa trabalho ne'ebe lidera husi SEII dadaun ne'e diskusaun ba revizaun lei ne'e rasik finaliza hotu ona.
"Ekipa lidera husi SEII konsege halo ona apoximasaun ho Komisaun A iha PN sira mak nain ba asunto lei, entaun karik iha possibilidade la halo lei ne'e hanesan proposta Governu nian, maibe konsidera hanesan Anti-Projeitu depois deputadu sira mak sai proponente hodi levanta iha plenariu diskusaun ba alterasaun lei ne'e," tenik nia.
Nia afirma, ekipa SEII ne'e mós la'os halo de’it aproximasaun ho PN ba revizaun lei refere, maibé ekipa ne'e ko'alia ho Ministeriu Justisa ne'ebé nain ba Kodigu Penal hodi hetan kolaborasaun ba revizaun lei ne'e rasik.
"Entaun ita presiza iha kolaborasaun servisu di’ak hodi halo transversal ba lei hodi bele kriiminaliza autor ne'ebé livre ba kazu insestu," hakotu nia.
Molok ne'e, Sekretáriu Estadu Igualdade no Inkluzaun (SEII), Maria do Rosariu Fatima Correia hateten, kada tinan hare ba kazu insestu ne'ebe akontese ba vitima sira, autor ba kazu relasaun sexual hasoru oan rasik nafatin livre, tanba seidauk iha lei no artigu ida hodi kriminaiza, entaun vitima sira ladun hetan justisa lolos.
Nia dehan, Ekipa ida ne'ebe SEII mak lidera hasoru ona Komisaun A iha PN hodi diskute ba revizaun dekretu nu. 7/2010 lei kontra Violensia Domestika (LKVD) harmonia ho Kodigu penal hodi bele kriiminaliza autor ba kazu insestu.
Tanba, iha kazu insestu ne'ebe Aman halo relasaun sexual hasoru oan, nan hola fali feton, avo hola fali beioan, durante autor ba krime insestu ne'e livre, tanba bainhira vitima lori kazu ba Tribunal Foti pena ba autor ladun todan, tanba dehan katak, vitima feto idade (14) eziste ona konsensiamentu, entaun tribunal konsidera la prense elementu ba krime.
Razaun seluk, tribunal konsidera la prense elementu krime, tanba iha kodigu penal la prense artigu espesial ida hodi bele aplika pena todan ba autor sira.
"Kazu ba insestu buras nafatin akontese ba labarik feto idade (14) mai kraik tribunal konsidera hodi fo pena todan ba autor sira, maibe labarik idade (14) ba leten, husi tribunal konsidera eziste konsentimentu, hakarak ho hakarak, entaun autor sira nafatin livre laiha lei ida kriiminaliza", dehan nia.
Entretantu, Asistensial Legal ba Feto no Labarik (ALFELA) preokupa ho autor ba kazu insestu livre, tanba laiha artigu ida iha kodigu penal hodi kriminaliza autor sira.
ALFELA mos konsidera iha lakunas balun ne'ebe justisa husi tribunal laiha ba vitima kazu insestu ho idade (14) ba leten ne'ebe hasoru hasoru relasaun sexual husi membru familia sira. Tanba tribunal konsidera eziste konsientimentu.
Directora Ezekutiva ALFELA, Marselina Amaral, AlFELA durante servisu ba halo ba asistensia legal ba feto no labarik hodi asesu ba justisa formal, maibe hare mos lakunas ne'ebe vitima ba kazu insestu ladun hetan justisa lolos.
"Ami hare vitima labarik feto ho idade (14) mai kraik lei proteje iha artigu 177 kodigu penal, maibe sei entaun sei problema mak vitma feto idade (14) ba leten laiha justisa ba autor sira, tanba konsidera eziste konsientimentu, entaun tenke kriminaliza duni autor sira ne'ebe livre", dehan nia.
Nia husu governu ho sosiedade hotu tenke hanoin lisuk ona oinsa bele kriminaliza autor sira, tanba membru familia hanesan aman ida hola fali nia oan no nan hola fali feton, avo mane hola fali bei-oan, maibe tribunal labele akuza tanba idade adulto konsidera autor ho vitima eziste konsientimentu.
Ho nune'e, iha tinan ne'e, ALFELA sei servisu hamutuk ho SEII no Ministeriu Justisa no Parseiru Sosidade Sivil hodi halo revizaun ba kodigu penal hodi bele kriminaliza autor Kazu insestu.
