Ministru Koordenador Assuntu Ekonómiku, Joaquim Amaral hatete, mandatu governu ida ne’e hela fulan balun de’it ona, maibé nia promete sei reajenda nafatin lei salariu minimu ba traballadór no nia parte fiar katak lei ne’e sei konklui drante nia mandatu.
"Ha'u fiar bele konklui iha fulan ida ne'e nia laran, ha'u fiar bele tanba uma vez nia sirkula ona, ita hein katak sei bele ajenda iha mandatu VIII Governu nia laran," dehan Joaquim Amaral hafoin hasoru Primeiru Ministru iha Palásiu Governu, (27/02).
Molok ne'e, Sekertáriu Estadu Formasaun Profesional Empregu (SEFOPE), aprezenta ona proposta lei protesaun traballadór Timor oan iha rai laran, bainhira hetan risku ka asidente ruma.
Sekretáriadu Estadu SEFOPE, Alarico do Rosario hatete, lei ne'e atu hare karik iha serbisu fatin maka traballador sira hetan asidente ruma, purezemplu liman ka ain tohar no kualker moras ka asidente ruma.
"SEFOPE iha oportunidade ida ohin mai halo aprezentasaun ida kona-ba oinsá proteje lei ida ba ita nia trabalador Timor oan sira iha rai laran see karik iha serbisu fatin hetan asidente ruma purezemplu liman tohar ka ain tohar kualker moras ka asidente ruma kona iha serbisu fatin," dehan nia hafoin partisipa iha reuniaun Konsellu Ministru, Kuarta (08/02).
Nia dehan, tanba ne'e mak SEFOPE halo lei ida ne'e mai aprezenta ba Governu nune'e atu bele asegura trabalador sira territóriu Timor-Leste. Lei ne'e dureitamenete ka espesifiku liu ka la halimar ba Timor oan sira liu-liu trabalador iha empregador sira.
"Ida ne'e atu asegura ita nia Timor oan sira serbisu karik bainhira hetan asidente ruma karik toma responsabilidade husi serbisu na'in sira atu tau matan ba assuntu ida ne'e, ida ne'e ita ko'alia iha ita nia rai laran, trabalador sira iha li'ur ne'e ketak ona," nia salienta.
Lei ida ne'e kompostu husi tripartida mak halo ne'ebé serbisu hamutuk ho reprezentante empregador no husi Sindikatu no mós Governu, ne'e mak ema bolu konsellu nasionál arbitrajen, konsellu nasionál du traballu hamutuk mak halo lei ida ne'e, tanba ne'e reprezentante hotu-hotu iha laran.
