Tuir Diretór Ezekutivu ANCI-TL, José Turky hatete, munisipiu lima ne’ebé kontribui ba kazu soe bebe mak hanesan, Dili, Manufahi, Baukau, Vikeke no Likisa. Husi dadus ne’ebé ANCI-TL rejista maioria iha kapital.
Tanba ne’e, ANCI-TL husu ba Parlamentu Nasional (PN) hanesan orgaun fiskalizadór no halo lei sira, nune’e hola papel hodi produz lei ho estatuto espesifiku hodi regula krime infantesidu ne’ebé persentajem aas iha TL.
Nia dehan, ANLCI-TL mai ho vizaun no misaun planu alternativu hodi konsolida no sosializa informasaun no politika inklizivu, luta kontra kazu infantesidu iha Timor-Leste.
Tan nee, hare ba ezersisiu ne’ebé aliansa halo, presiza ema hotu nia atensaun liliu membro governu sira, parte media sira nia intervensaun oinsa bele luta ho komitmentu ida hodi hapara krime infantesidu iha TL.
“Ita hotu hatene katak TL presiza lideransa ne’ebé diak, tan nee ita hotu tenki tau atensaun oinsá atu kuidadu ita nia jerasaun foun hodi servi ita nia nasaun iha futuru,” dehan nia iha Salaun FONGTIL, Kaikoli, tersa (15/08).
Tuir nia, iha tinan 2023 kazu soe bebe númeru kiik ka rua deit, kompara ho tinan hirak ba kotuk.
“Tan ne’e ami husi ANCI-TL hatoo deseju boot ba parte seguransa no saúde, autoriade lokal sira, tanba servisu hamutuk hodi hatudu rezultadu diak iha tinan 2023 rejista kazu númeru tun liu kompara ho tinan sira liu ba kotuk,” katak nia.
Atu prevene kazu soe bebe ne’e, ANCI-TL rekomenda rekomenda ba parte governu hanesan ezekutor atu kria espasu ida ne’ebé diak hodi fó protesaun ba joven sira.
Iha biban ne’e, ANCI-TL mós husu ba parte relevante sira hanesan, relijioza, ministeriu edukasaun, saúde, apoiu edukasaun moral ba jovem feto no mane, atu hola papel adekuadu halo prevensaun ba aktu imoral sira ne’ebé kontinua akontese iha fatin-fatin.
Nune’e mós, ba autoriedade lokal sira ne'ebé sai matan no tilun ba komunidade sira iha obrigasaun moral hola papel hodi transmite informasaun ba komunidade atu garante suku refere livre husi kazu soe bebe.
Entretantu, ANCI-TL mós husu ba média sira atu transmiti informasaun factual no kredivel hodi hasa’e koñesimentu sosiedade sira nian ba luta hodi elemina kazu soe bebe iha TL.
