“Programa Bolsa da Mãe Jerasaun Foun, Ministériu Solidariedade Sosial no Inkluzasun halo ona sosializasaun ba fatin hotu ne’ebé sai alvu ba programa refere,” dehan Diretór Nasional ba Asistensia Sosial iha MSSI, Lucas Tois, iha Salaun ADTL, Mascarenhas, kuarta (16/08).
Nia dehan, iha nasionál, ministériu la halo sosializasaun tanba Dili seidauk tama iha alvu ba programa BdM-JF, maibé organizasaun Asosiasaun Defisiénsia Timor-Leste bele adianta liu tan, atu nune’e ministériu bele hato’o informasaun ba programa refere.
Enkuantu, ba programa BdM-JF, durante ne’e, MSSI rejista total aplikante husi munisipiu hitu ne’ebé sai alvu ba programa refere no labarik ne’ebé identifika ona hanesan defisiénsia hamutuk 130.
Husi munisipiu ne'ebé sai alvu ba programa refere, iha faze dahuluk tinan 2022, implementa iha Munisipiu Ainaro, Bobonaro no RAEOA.
Nune’e, iha faze daruak ne’ebé implementa iha tinan ida ne’e (2023), mak iha Munisipiu Vikeke, Kovalima, Líkisa no Manatuto.
Iha fatin hanesan, Diretór Ezekutivu ADTL, Cesário da Silva hatete, ADTL konvida Ministeriu Solidadriadade Sosial no Inkluzaun (MSSI) atu dezamina informasaun sira kona-bá Bolsa da Mãe-Jerasaun Foun (BdM-JF) ba organizasaun sira ne’ebé servisu no tau matan ba ema ho defisiénsia.
“Ohin ne’e organizasaun sira ne’ebé servisu no tau matan ba ema ho defisiénsia hola parte iha ne’e hodi rona informasaun husi MSSI, atu intende didiak programa ida BdM-JF ne’e, no rekezitus sira husi programa nee,” dehan nia.
Ezekutivu ne’e hatutan, durante ne’e ADTL preokupa mak labarik ho defisiénsia sira lahetan apoiu ruma liliu subsidiu ne’ebé iha, maibé ho programa governu nian konaba Bolsa da Mãe Jerasaun Foun, bele tulun ona labarik ho defisiénsia sira iha baze.
“Ami nia parte rona informasaun ida ne’e hodi tulun maluk liliu labarik defisiénsia sira iha baze, atu bele hola parte mós iha programa BdM-JF,” dehan nia.
Entretantu, Diretor ne’e afirma, ADTL halo ona aproximasaun ba munispiu sira ne’ebé sai trajetu ba programa BdM-JF, atu nune’e sira bele tulun hodi identifika labarik ho defisiénsia hodi bele asesu ba programa refere.
