“Ohin ami mós ko'alia oinsá atu reforsa servisu sira, tanba ne'e ami tenta buka assuntu ida ne'ebé ami bele hola parte iha dezenvolvimentu rural no abitasaun komunitaria nian,” dehan Embaixadór, iha Auditoriu Gabinete Vise Primeiru Ministru, iha Palasiu Governu (16/08/23).

Embaixadór informa, assuntu sira ne'ebé entre parte rua diskute ne'e sei jerál, tanba ne'e ba oin sei enkontru bebeik hodi haré assuntu sira ho detallu.

Iha fatin hanesan, Vise-Primeiru Ministru, Ministru Koordenador Asuntus Sosiais no Ministru Dezenvolvimentu Rural no Abitasaun Komunitáriu, Mariano Assanami Sabinu, hato'o agradese ba Estadu Repúblika Indonézia liu husi ninia embaixadór iha Timor-Leste ne'ebé kontinua hatudu sira nia komitmentu hodi apoiu Timor nia dezenvolvimentu.

Ministru dehan, Timor ho Indonézia nudar nasaun vizijiñu ne'ebé iha kooperasaun servisu ne'ebé di'ak tebes iha área polítika, sosiu ekonomiku no kultural nian.

“Ohin enkontru ne'e ami ko'alia oinsá atu hametin relasaun servisu entre nasaun rua iha futuru, liu-liu oinsá atu hametin koordenasaun servisu iha área dezenvolvimentu rural no abitasaun komunitaria nian,” dehan Vise-Primeiru Ministru.

Iha IX Governu Konstitusionál iha ona ministériu ida ne'ebé espesial haree ba dezenvolvimentu rural nian, entaun aldeia no suku sira iha hotu rural ne'ebá, durante ne'e governu liu husi nia parseiru dezenvolvimentu hahú ona servisu iha kraik, agora tempu ona atu halo mapamentu hodi integra dezenvolvimentu, saida mak governu bele halo, no saida mak parseiru dezenvolvimentu sira bele halo iha futuru.

Enkuantu, iha enkontru ne'e, parte rua troka hanoin oinsá atu hametin servisu bilateral entre Governu Indonezia no Timor-Leste, liu-liu área importante sira ne'ebé tutela direita ba Vise-Primeiru Ministru.