Tuir Xefe Suku Kamea, Matos da Costa, hetete, iha suku refere komunidade sira iha aldeia neen mak desde uluk to’o agora susar asesu ba bee moos, tanba aldeia neen ne’e lokaliza iha foho leten.

"Suku Kamea nia aldeia ne'en ne'ebé susar atu assesu ba bee moos, tanba área lokalizasaun iha foho leten ho nune'e susar ba sira atu hetan bee moos," dehan nia ba Jornalista INDEPENDENTE iha knar fatin, Sede Suku Kamea, (17/10).

Nia esplika, aldeia neen ne’ebé lokaliza iha foho leten, ne’eb’e susar asesu bee moos mak hanesan, Aldeia Bedois, Ailele Hun,  Lenuk Hun, Buburlau, Aidak Bihare, Caisab.

Nia hatutan, ba aldeia hitu seluk ne’ebé lokaliza iha tetuk ne’e, bee iha maibé iha failansu tekniku balun, nune’e komunidade sira ladun asesu bee ho diak.

Iha sorin seluk, Xefe Aldeia Bedois, José Pereira Carceres de Carvalho, mós preokupa tanba durante tempu naruk nia laran ona sira nafatin halerik ba bee moos, maibé la iha parte relevante ruma mak bele aselera problema refere.

"Bee ne'ebé ami assesu ne'e oferese husi Amu Parokia Bedois, Albertin Franco Morato hodi bolu makina fura bee, hodi oferese ba bairu ne’ebé existe iha ami nia aldeia", dehan nia.

Tuir nia, bee moos sira ne’ebé konsumu, semana ida mai dala rua, nune’e susar ba sira atu kobre hotu sira nia nesesidade bazika sira.

Entretantu, tuir komunidade Joanina Soares Amaral iha Aldeia Has Laran, haktuir katak, bee ne’ebé kanaliza iha aldeia refere, semana rua ona paradu, ida ne’e prejudika tebes ba sira nia nesesidade lorloron nian.

“Ami nia bee la mai kuaze semana rua ona, tan ne’e ami kuru bee ho distansia ne’ebé dook, maibé ami nafatin mai kuru hodi uza ba ami nia nesesidade no oan sira ba eskola,” dehan nia.

Enkuantu, tuir observasaun Jornalista INDEPEDENTE iha terrenu nota katak, komunidade sira inklui labarik sira lalin jeriken no balde hodi kuru bee ne’ebé iha fatin refere.