Tuir komunikandu ne'ebé Online INDEPENDENTE sita katak, sidadaun timoroan 51 ne'ebé tuir formasaun Agrikultura no Ortikultura, iha Sentru Internasionál Formasaun Agríkola Arava (AICAIT), deklara ona katak estudante sira hakarak nafatin hodi hela iha Israel, maske iha eskala konflitu entre Israel no territóriu Palestinianu maibé situasaun iha rejiaun refere hakmatek.
"Desizaun ida-ne’e, tuir deklarasaun husi Diretóra AICAIT, Dafna Gommershtadt, ne’ebé asegura ona katak estudante sira iha Arava hotu-hotu di’ak no iha situasaun seguru no hahú husi loron-segunda, loron 16, estudante sira hahú fali ona sira-nia estudu," dehan Komunikandu husi Media Gabinete Presidensia Konsellu Ministru ne'ebé Online INDEPENDENTE sita iha Kuarta (18/10).
Tan ne'e, Governu Timor-Leste konsidera desizaun estudante sira nian ne’e no garante seguransa ne’ebé fornese husi Diretóra AICAIT, tan ne'e Governu deside ona hodi suspende kontaktu atu haruka fila estudante timoroan sira.
Maibé, Governu sei mantein kontaktu regulár ho sidadaun hirak-ne’e, hodi fornese informasaun atualizada no koordena ho autoridade relevante hodi garante sira-nia seguransa.
Enkuantu, Portavós Governu Agio Pereira, garante katak kontinua halo vijilánsia ba situasaun, sai hanesan prioridade ida ba Governu Timor-Leste, ne’ebé sei foti medida adisionál sira, karik presiza, hodi asegura sidadaun sira-nia moris di’ak iha Israel.
