Prezidente ANCI-TL, José Turky, hatete, kazu infantesidu ne’ebé kontinua akontese, asaun ne’e hanesan viola bebe nia liberdade moris no forma deskriminasaun kontra umanidade ba baze legal sira ne’ebé vigora hela.
Tanba ne’e, Aliansa Nasional Kombate Infantesidu iha Timor-Leste rekomenda ba parte relevante sira hanesan Igreja, Ministeriu Edukasaun no Ministeriu Saúde atu apoiu edukasaun moral ba jovem feto no mane atu hola papel adekuadu no halo prevensaun ba aktu imoral sira ne’ebé kontinua akontese.
“ANCI-TL husu ba PNTL Munisipiu Dili buka tuir autor ne'ebé mak halo asaun hodi viola bebe nia vida, nune’e submete tuir dalan legal,”dehan nia liu husi konferensia imprensa, iha Salaun FONGTIL, Kaikoli, (18/10).
Nia hatutan, ba media sira mós atu hola papel importante ida atu transforma informasaun factual no kredivél hodi hasa’e kuiñesimentu koñesimentu sosiedade nian hodi luta elimina kazu soe bebe iha Timor-Leste.
Tanba, kazu infantesidu ne’e hanesan, aktus extraordinariu ida ne’ebé prejudika tebes estabilidade umana.
“Hare ba asaun ne’ebé viola bebe nia vida, ami konsidera hanesan aktus extraordinariu ida ne’ebé prejudika tebes estabilidade umanu, hodi hafraku fidelidade umanu social,” dehan nia.
Entretantu, ANCI-TL mós rekomenda ba Parlamentu Nasional hanesan segundu orgaun fiskalizadora atu halo revizaun ba kodigu penal, iha artigu ida ne’ebé ninia deskrisaun hatur penalidade ba feto, juridikamente la kriminaliza autor mane.
Enkuantu, tuir dadus ne’ebé ANCI-TL rejista hahú husi fulan-Janeiru to’o Outubru 2023 kazu infantesidu hamutuk na’in haat, ne’ebé mai husi Munisipiu Baukau no Kapital Dili.
