Foun liu, Embaixada Japaun iha Timor-Leste selebra tan kontratu Grant Assistance Human Security Project (GGP) ho Millenials Youth Association (MYA) no NGO Alfar Star ba projetu harii Postu Saúde iha Suku Humboe, Postu Administrativu Ermera, no fornese bee iha Aldeia Otete, suku Manusae, Postu Administrativu Hatulia, Munisipiu Ermera.
"Ha’u haksolok atu sai uma-na’in ba serimónia asinatura ba projetu Grant Assistance Human Security Project foun atu kontrata postu saúde iha Suku Humboe no sistema abastesimentu bee-moos iha Suku Manusae. Ha’u hato’o ha’u-nia apresiasaun sinseru ba ita-boot sira-nia prezensa ohin," dehan Embaixador Japaun iha Timor-leste, Tetsuya Kymura, liu husi ninia diskursu, iha salaun Embaixada Japaun, Praia dos Coqueiros, Tersa (03/12).
Desde tinan 1999, nia dehan, molok nasaun ne’e restaura nia independénsia, Japaun ajuda ona Timor-Leste no tinan ida ne’e marka aniversáriu ba dala 25.
Iha tempu ne’ebá, Japaun konvoka ona konferénsia doadóres internasionál dahuluk iha Tókiu iha fulan Dezembru, ho inisiativa hodi apela ba komunidade internasionál atu apoia Timor-Leste.
Hahú husi tinan 1999 liu-husi parseria besik ho Governu Timor-Leste, ONG Japoneza no Timor-oan, no organizasaun internasionál sira, Japaun implementa ona projetu relasiona ho saúde 60 resin iha nasaun ne’e tomak.
"Purezemplu, agora daudaun ami moderniza hela Sentru Saúde Komunitáriu hamutuk 20 iha munisípiu 12 nia laran."
“Adisionalmente, ami asina ona Troka Nota hodi konstrui edifisiu andar haat ne’ebé sei inklui sala obstetrísia no jinekolojia nian ho sala partu iha Hospitál Nasionál Guido Valadares, ne'ebé sei remata iha tinan 2027.
Japaun mós hala'o hela projetu ida hodi solariza postu saúde sira balun, no Japaun ninia kooperasaun iha setór infraestrutura mós iha abut kle’an.
"Ami-nia projetu dahuluk iha setór bee nian mak kona-ba hadi'a sistema fornesimentu bee nian iha tinan 2000, no hahú husi ne'ebá ami implementa ona projetu hamutuk 60 resin".
Iha 3 Dezembru, nia dehan, asina kontratu GGP foun rua, mak hanesan projetu ba konstrusaun Postu Saúde ho Millenials Youth Association no projetu ba konstrusaun sistema fornesimentu bee-moos ho Alfa Star. Projetu rua ne’e implementa iha Munisípiu Ermera. Enkuantu GGP implementa ona projetu hamutuk 16 iha Ermera.
Nia dehan, ba promosaun seguransa umana, organizasaun lokál sira sai parseiru importante tebes sira. Organizasaun lokál rua, Millenials Youth Association no Alfa Star, sei implementa projetu ne'e hodi hadi'a asesu ba kuidadu saúde no bee-moos ba povu iha suku sira.
"Permite ha'u atu kongratula organizasaun rua ne'e iha inísiu ofisiál projetu sira-nian. Ha’u hein katak imi idaidak sei hala’o servisu di’ak nafatin hodi kompleta projetu ida-idak ho susesu. Ha'u hein tebes, atu hasoru fali imi hotu, no ema sira husi fatin projetu nian, iha serimónia entrega hodi selebra kompletasaun projetu sira-nian."
Embaixador ne’e husu ba autoridade lokál sira, no ofisiál sira ne'ebé iha responsabilidade ba operasaun no supervizaun ba instalasaun sira ne'e, atu asume responsabilidade hodi asegura utilizasaun no manutensaun di'ak, inklui alokasaun orsamentu, atu nune'e ema bele uza installasaun sira ne’e ba tinan barak nu'udar símbolu amizade nian entre Japaun no Timor-Leste.
Aleinde, nia mos hakarak husu ba parte hotu-hotu ne’ebé envolve, atu fó apoiu ba esforsu hirak ne’e. Nune'e nia dezeju susesu ba imi-nia projetu sira, prosperiedade Timor-Leste nian.
Iha fatin hanesan, Ministru Obras Públika (MOP), Samuel Marcal hatete, maske Japaun rai ida ne'ebé dook husi Timor-Leste, maibé sira nia fuan ne’e iha Timor-leste.
"Desde 1999 to'o agora sira-nia apoiu ne’e sura la to'o, tanba ne'e ha'u lori Governu no povu tomak agredese ba Governu Japaun, tanba la'os de’it ajuda, ha'u hatene katak, buat barak ne'ebé sira ajuda direita ba povu nia nessidade baziku liu, liu-liu infrastrutura no buat barak, saude no ligadu ho bee-moos," dehan nia.
Reprezentante Ministériu Saude (MS), Diretora Jeral Unidade Jestaun Projeitu Saúde, Adela Maria Moniz Bareto agredese ba Embaixada Japaun apoiu ona projeitu harii Postu Saúde iha Ermera.
Ho projetu ne’ebé implementa, nia dehan, bele hatan ba populasaun sira hodi asesu ba saude.
“Komunidade sira iha Humboe atu asesu ba fasilidade saude tenke la'o dook, maibé ho projetu konstrusaun postu Saúde ne’e sira bele asesu ho besik,” dehan nia.
Diretor Ezekutivu ONG Alfa Star, Albertino Emilio Franze informa, orsamentu ne'ebé Governu Japaun apoiu ba projetu bee iha aldeia Otete ho total rihun $809 resin.
"Ida ne'e mak ita sei uza atu harii sistema bee. Harii tanki ida iha bee-matan hodi tau bee hamutuk hodi tuun ba besik komunidade sira, no iha komunidade nia leet ita sei tau tanki boot rua,” nia esplika.
Projetu ne’e ho tarjetu durasaun fulan lima no uma-kain 140 ho total ema na’in 802 mak sai benefisiariu.
Diretór MYA, Octaviano Maria dos Santos hatete, orsamentu ba projetu harii Postu Saúde rihun $143 resin.
Postu Saude ne’ebé konstrui ho medida 19×12, ho sala partus ida, farmasia ida, erfermajen ida, sala konsultasaun martinidade ida, sala konsultasaun jeral ida, sala laboratoriu ida no seluk tan.
Projetu konstrusaun ne’e ho durasaun fulan ualu.
