Tuir komunikandu ne’ebé Online INDEPEDENTE asesu katak, Austrália ho orgullu anúnsia informasaun kona-ba Pacific Engagement Visa, ida ne’e vistu rezidénsia permanente foun ne’ebé sei fó oportunidade ba sidadaun Pasífiku no Timor-Leste nian ne’ebé mak elijível atu bele servisu, estuda no hela iha Austrália.
Tan ne’e, iha tinan 2024, Austrália sei fornese vistu 300 ba sidadaun Timoroan, inklui parseiru ho oan-sira, liuhusi prosesu selesionadu aleatoriamente ida.
Embaixadora Australiana ba Timor-Leste, Caitlin Wilson, dehan vistu foun ida ne’e sei ajuda hakle’an koneksaun entre Austrália ho Timor-Leste.
“Ha’u orgullu bele haree Timor-Leste mós hola parte iha Pacific Engagement Visa, ida ne’e sei hametin tan ligasaun entre ema-ho-ema entre ita-nia nasaun rua ne’e no sei fasilita kolaborasaun bo’ot liu tán iha asuntu kulturál, negósiu no edukasaun nian.
Nia dehan, sidadaun timoroan ne’ebé partisipa iha programa ne’e sei hetan asesu ba suporta oin-oin iha Austrália, inklui servisu rezolusaun migrante, programa kursu Lian Inglés, asesu ba eskola públika no saúde, no suporta finansiál atu enkoraja partisipasaun iha estudu no formasaun sira.