Enkuantu, traballadór hirak ne’e kompostu husi mane na’in 76 no feto na’in 15. Husi númeru traballadór hirak ne’e sei ba hala’o servisu iha área agrikultura nian.

Sekretariu Estadu Formasaun Profisionál no Empregu Rogério Araújo Mendonça, husu ba traballadór sira bainhira ba servisu tenki kumpri lei ne'ebé regula ona iha ema nia nasaun.

Tuir nia, bainhira traballadór sira ne’ebé asina ona deklarasaun no kontratu ho ema nasaun seluk, iha obrigatóriu atu halo tuir kontratu ne'ebé iha, maibé kuandu traballadór sira mak kontra ka hakarak sai illegal, estadu rua sei latau matan.

“Ita boot sira hatene, kultura Timor ho Australia lahanesan, ita boot sira ne'ebé ba servisu tenki tuir regras ka prosedimentu ne’ebé kompaña fó ba imi,” dehan nia iha Salaun Timor-Lodge, sesta (28/07).

Tan ne'e, Sekretariu Estadu Formasaun  Profesional no Empregu husu ba inan-aman no familia traballadór atu eduka oan sira ne'ebé atu ba servisu iha ema nia rai atu kumpri regra ka lei iha nasaun refere.

Iha fatin hanesan, Segundu Sekretária Embaixada Australia iha Timor Penny Roberts hatoo parabens ba traballadór sira ne'ebé selesionadu ona atu ba servisu iha Australia.

Nia dehan, traballadór hirak ne'e prosesu barak mak sira liu, tan ne'e, bainhira ba servisu la'os hare de'it ba traballadór sira nia abilidade maibé haree mós komitmentu sira nian.

 “Ami hatene katak imi sei hanoin imi nia fámilia ne'ebé esforsu ba imi maibé espera katak esperensia, koñesementu ne'ebé imi hetan, bele lori fial-fali mai hodi kontribui ba imi nia familia,” nia hatoo.

Iha biban ne'e mós, Lucinda da Silva Gusmão hatete, hanesan traballadór kontenti tanba bele hetan opotunidade ne'e atu ba servisu hodi sustenta familia.

“Ha'u senti kontenti tanba bele ba servisu iha Australia, tan ne'e bainhira osan ne'ebé ha'u hetan sei hare fali ha’u nia familia nia nesesidade no alin sira nia eskola,” dehan nia.

Entertantu, traballadór hirak ne’e sei aranka ba Australia iha loron 31 fulan-Jullu tinan 2023.