Selebrasaun loron mundial ai-Parapa ho tema “Kuidadu Ai-Parapa sei hametin rezilensia hasoru alterasaun klimátika”.

Sekretáriu Estadu Floresta, Fernandino Vieira da Costa iha nia diskursu hatete, ai-parapa ho nia eko-sistema eziste entre rai-maran ho tasi ne'ebé kontribui ba ema nia bem-estar moris di'ak no seguransa alimentar proteje komunidade iha área kontezia sira.

“Ai-Parapa nia funsaun atu fó protésaun ba ikan ka animál seluk ne'ebé moris iha tasi laran,no  sai mos fatin ba balada seluk ne'ebé moris iha ai-laran, funsaun ida mak salva karik mosu tsunami no erosaun” dehan SEF iha Suku Sabuli, Metinaro, Sesta (28/07).

Sekretáriu afirma, nasaun Timor-Leste iha tinan 1940 ai-parapa iha hektares rihun sia (9000), maibé tuir realidade survey ne'ebé iha TL nia ai-Parapa hela hektares rihun haat (4000), no lakon ona ai-parapa hektares rihun lima (5000).

Tan ne'e nia dehan, iha programa Governu dasia nia sei tau mós konsiderasaun ba dezenvolvimentu ai-parapa, área kosteia ne'e importante tebes.

Tuir nia, iha Orsamentu Jeral Estadu tinan 2024 sei aloka mós osan ba dezenvolvimentu ai-parapa.

Nia dehan, ai-parapa lakon hektares rihun lima, kauza mai husi sendimentasaun ne'ebé tun husi foho leten mak estraga, atividade umana nia lorloron, ema tesi ba enerjia uma-laran nian, maibé Governu iha responsabilidade nafatin atu hare asuntu ne'e.

“Apela ba komunidade no inan-aman sira ne'ebé moris iha área kosteria sira liliu iha área tasi ninin mai ita hotu hamutuk atu kuidadu ita nia ai-parapa sira ne'ebé ita kuda ona tanba funsun ai-parapa importante tebes ba ita nia moris,” nia hatoo. 

Iha fatin hanesan, Administradór Postu Administrativu Metinaro, Júlio Norberto hato'o agradese ba Sekretáriu Estadu Flores, tanba bele kuda ona ai-parapa, tan ne'e husu ba komunidade sira atu kuidadu no proteje ai-horis hodi fó buras nafatin.

“Floresta implementa de'it, maibé kuidadu ne'e komunidade sira, se la iha komunidade, kontribuisaun ema hotu nia maske gasta orsamentu boot ba kuda ai-Parapa maibé sei la iha tan. Tan ne'e mak presiza servisu hamutuk atu nunee bele alkansa futuru ida ne'ebé diak ba ai-Parapa” dehan Administrador.

Administror dehan, antes nee liu-husi programa mão-de-obra kuda uluk ona ai-parapa oan hamutuk 200 iha fatin refere, atu nune'e bele konzerva diak liu, liliu prezerva eko-sistema ne'ebé hela iha ai-parapa laran no bele tahan tasi.